3-тӥ тулыспалэ «Удмурт дунне» газетлэн редакцияз литература творчествоя «ИнГОЖ»студия ужаны кутскиз.

Студиын дышетскон радъяськоз толэзяз одӥг пол. Нырысетӥ пумиськонын туала удмурт литература, солэн азинскыны луонлыкъёсыз, егит авторъёс но соослэн ужъёссы, туала лыдӟись сярысь вераськизы. Вераськонэ пыриськизы зэмос гожъяськисьёс но озьы ик та сюресэ али гинэ султэм егитъёс, студентъёс.

Азьпалан «ИнГожлэн» дышетскисьёсыз финн-угор калыкъёслэн литератураысьтызы тужгес но зол произведениосынызы тодматскозы. Тужгес лэчыт ужпумъёсты эскерозы диспутъёсын, вераськон ӝытъёсын. Нимысьтыз саклык висъямын луоз гожъяськыны кутскисьёслэсь художественной амалъёсты кутыны дышетонлы, теория юанъёсты валэктонлы. Самой ӟечъёсыз ужъёс толэзьлы быдэ потӥсь «ИнГож» газетлэн бамаз печатласькозы.

Справка:

Гожъяськисьёслэн нырысетӥ огазеяськонзы кылдытэмын вал «Гудыри» газетлэн редакцияз 1919-тӥ арны. Радъязы солэсь ужзэ Т.Борисов, К. Герд. Ортчытэмын вал 8 занятие.

Бӧрысь литогазеяськонэн пӧртэм аръёсы кивалтизы К. Митрей, М. Петров, А. Лужанин, Т. Шмаков, В. Широбоков, Ф. Васильев, С. Самсонов.Гожъяськыны кутскисьёслы нимысьтыз семинаръёс радъяллязы. 1980-ти аръёсы огазазеяськонэн кивалтизы К. Ломагин, Т. Чернова. Газетлэн бамаз литературалы сӥзем нимысьтыз полоса «Тугоко» кылдытэмын вал

1990-тӥ аръёсы огазеяськон ужамысь дугдӥз.

2012-ти аре «Удмурт дунне» газет та сямез выльысь улӟытиз, толэзлы быдэ «ИнГОЖ» номер поттыны кутскиз.