7-28-тӥ оштолэзе кыкетӥ ползэ «Удмуртия – вместе!» (16+) интывыл огинъёслэн форумъёссы ортчозы, кудъёсыз муниципал кылдытэтъёсты огазеялоз. Форумъёс юрттозы ӵектосъёсын, малпанъёсын, кичӧлтонъёсын тодматскыны, мерлык удысын ӧнерлыко герӟетъёсты юнматыны, озьы ик кун йӧскалык политикаез улонэ вӧлмытыны.

Радъясьёс ужрадэз сӥзёзы Россиысь калыкъёслэн огъя луэмзылэн арезлы, кудзэ кунмылэз Азьмуртэз 2026-тӥ аре юнматӥз.

Форуме пыроз пленарной кенешон, кудаз элькунмылэн йӧскалык политикалэн стратегиез, граждан мерлыклэн луонлыкъёсыз, муниципал кылдытэтъёслэн ужъёссы сярысь мыло-кыдо вераськозы. Котырес ӝӧк сьӧрын дунлыкъёс, «Удмурт Элькунысь 7-тӥ классын дышетскисьёслы Эшъяськон урок» ужрад сярысь кенешозы, ортчоз модерационной сессия. Программаын вылез – искусственной интеллектэз интывыл огинъёслэн ужазы кутон. Озьы ик грант вожвылъяськонъёсын дырпус адӟытэмын луоз. Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

Туэ форум элькунлэн ньыль интыосаз ортчоз: 7-тӥ оштолэзе – Воткакарын, 15-тӥ оштолэзе – Уваын, 23-тӥ оштолэзе – Глазкарын, 28-тӥ оштолэзе – Пичи Пургаын. Форумъёсы быгато пыриськыны муниципал кылдытэтъёслэн тӧрооссы, кар, ёрос но гурт администрациосысь ужасьёс, мерлык кенешъёсысь ёзчиос, муниципал кичӧлтонъёслэн но этнокультурной ӵектосъёслэн кылдытӥсьёссы, мерлык но йӧскалык-лулчеберетъя огазеяськонъёслэн кивалтӥсьёссы но азьмынӥсьёссы, коньдэтэн возиськись дышетонъя, лулчеберетъя, егитъёсын ужан политикая ужъюртъёсысь ужасьёс, озьы ик ужбергатӥсьёс.

Форуме пыриськон понна, регистрациез ортчоно.

Воткакарын регистрация 1-тӥ оштолэзёзь ортче та чӧлскетъя: https://forms.yandex.ru/u/69ba44b4902902fba53e1012/

Уваын регистрация 5-тӥ оштолэзёзь ортче та чӧлскетъя: https://forms.yandex.ru/cloud/69c264d902848f316981f10b/

Глазкарын карын регистрация 10-тӥ оштолэзёзь ортче та чӧлскетъя: https://forms.yandex.ru/u/69c272c86d2d73370b4b57e8/

Пичи Пургаын регистрация 15-тӥ оштолэзёзь ортче та чӧлскетъя: https://forms.yandex.ru/u/69c2a7bde010db42f9bc9747/

Пыр-почгес «Вконтакте» ужрадлэн огиназ https://vk.com/urvmeste но сайте «Удмуртия – вместе» вотэсбамын.

Форумъёсты радъяло Калыкъёслэн Эшъяськон юртсы, Удмуртиысь Мерлык палата УЭ-ысь йӧскалык политика министерстволэн но Кивалтэтлэн Администрациезлэн юрттэменызы.

Тодэ вайытом, форум нырысьсэ 2025-тӥ арын ортчиз. Со 500-лэсь трос адямиосты люказ быдэс Удмуртиысь.