Бигеръёслэн но башкиръёслэн тулыс бусы ужъёсты быдтонэн герӟаськем «Сабантуй» шулдыръяськонзы 28-тӥ инвожое Сарапул ёросын ортчиз. Ужрадэ 7 сюрслэсь уно адями вуиз. Туэ Сабантуй Атыкай музъемез утисьлэн арезлы сӥземын вал.

Ужрад калык кусыпъёсты юнматэ но азинтэ, Россиысь калыкъёслэсь лулчеберет узырлыксэз уте, ваньмыз та «Семья» йӧскалык ӵектослэн азьмугъёсызлы тупало. «Сабантуй» шулдыръяськонлэн валтӥсь тодметэз – йӧскалык пужыё кышет.

Сӥё-дано усьтонын куноосты пумитазы Кун Думаысь депутат Олег Гарин, Удмуртиысь Кивалтэтлэн Председателезлэн воштӥсез Роман Габдрахманов, Сарапул карлэн тӧроез Виктор Шестаков, йӧскалык политикая министр Эдуард Петров, бигер но башкир мер огазеяськонъёслэн ёзчиоссы.

Сабантуез валэн вортылон усьтӥз. Со ужрадлэн висъянтэм люкетэз.

Ужрадэ элькунмылэн каръёсысьтыз но ёросъёсысьтыз, Татарстанысь но Башкортостанысь куноос вуизы. Соос йӧскалык дӥсьёссэс адӟытӥзы.

Нунал туж тунсыко ортчиз пӧртэм площадкаос ужан сэрен, кылсярысь, «Көрәш» йӧскалык нюръяськон, юбое тубан.

Озьы ик пиналъёс но бадӟымъёс понна трос йӧскалык шудонъёсын но вожвылъяськонъёсын площадкаос радъямын вал: гираен спорт, армрестлинг, карнанэн бызьылон, юбое тубан, канатэз кыскан, ворсам синъёсын горшокъёсты шуккылон, пу вылын мешокъёсын нюръяськон, коньдонэз катыкысь утчан, мешокъёсын бызьылон но трос мукет. Егитъёслы сӥзем площадка тунсыко луиз мастер-классъёсыныз, флешмобъёсыныз, вожвылъяськонъёсыныз но шудонъёсыныз. Озьы ик Татарстан но Башкортостан Элькунъёслэн площадкаоссы ужазы.

«Сабантуй» шулдыръяськон йылпумъяськиз батырез, озьы ик спорт нюръяськонъёсысь но кылдытос ужъя вожвылъяськонъёсысь вормисьёсты данъетанэн.