24-тӥ инвожое бигеръёслэн но башкиръёслэн Сабантуй (0+) калык шулдыръяськонзы радъяськиз, кудӥз тулыс бусы ужъёсын герӟаськемын.

Сӥё-дано усьтонэ пыриськизы Удмуртиысь Кивалтэтлэн Тӧроезлэн воштӥсез Ильяс Ханнанов, Удмуртиысь Кун Кенешлэн председателез Владимир Невоструев, йӧскалык политикая министр Эдуард Петров, Кун Думалэн депутатэз Олег Гарин, бигер но башкир мерлык огазеяськонъёсысь азьветлӥсьёс.

Йӧскалык политикая министр Эдуард Петров ваньзэсты бусы ужъёслэн быременызы ӟечкылаз: «Сабантуй – со ужлэн праздникез, куно карон но бигер, башкир калыкъёслэн аспӧртэмлыксы. Нюръяськон мылкыдын, пӧртэм арлыдъемъёслы но калыкъёслы тупась калык шудонъёсын бордаз со кыске». Валтӥсь сцена вылын министр бигер кылын гожъяны-лыдӟыны дышетӥсь усточиосты тау каронъёсын данъетаз.

Владимир Невоструев калык сям-йылолъёсты утёно, егитъёсты йӧскалык лулчеберетэ кысконо шуыса пусйиз. Ваньмыз та калыклэсь асваланзэ, вордскем дорез гажан но патриотизмо мылкыдэз юнматыны юрттоз.

Шулдыръяськонлэн валтӥсь ужрадэз – валэн ворттылон, кудӥз 10:00 часын ӵукна кутскиз. Борӟемчиос асьсэлэсь но Вятской, Арабской но Чистокровной валъёслэсь быгатонлыкъёссэс возьматӥзы. Ӵошатсконэ пыриськисьёс выро-гопо сюрес пыр ортчизы.

Нунал ӵоже пӧртэм площадкаос ужазы. Соос бигер но башкир калыкъёслэсь лулчеберетсэс но сям-йылолъёссэс ӟечгес тодыны юрттӥзы.

Люкаськемъёслы пӧртэм площадкаос усьтэмын вал. Кылсярысь, та шулдыръяськон тодмо луэ «Көрәш» йӧскалык нюръяськонэн. Котькуд арлыд категориын вормисьёсты быръё. Элькунысь Тӧролэн Александр Бречаловлэн кичӧлтэмезъя, таиз ар егитъёслэн арзы шуыса пусйиське. Талы луыса, Агрыз ёросысь, Татарстан но Башкортостан Элькунысь егитъёслы сӥзем площадкаос ужазы.

Со сяна, лыктэм куноослы «Татар чае» чайлэн праздникез, «Милләтем бизәге – калфагым» йыре пононъёсын адӟытон, сям-йылол шудонъёс радъямын вал. Йӧскалык сиён-юонъёс но шумпоттытӥзы лыктэм куноосты.

Тросгес туспуктэмъёс шедьтыны луоз Калыкъёслэн Эшъяськон юртсылэн вотэсбамаз