Отчы элькунысь дышетӥсьёс но дышетскисьёс пыриськозы, школаосысь 10 командаос вожвылъяськозы.

Куинь нунал куспын нылпиослы ватсам реальностья приложение лэсьтоно луоз. Инъетэз «Чечыен нянь» изданиысь Петр Кириллович Поздеев удмурт гожъясьчилэн но кылосчилэн бичам басняосыз но веросъёсыз. Та книга 1984-тӥ аре поттэмын но Удмурт Элькунысь Йӧскалык лыдӟетъюртын возиське.
Пыриськисьёсты узыр дышетскон программа возьма: лекциос, практикумъёс, ужан сессиос, элькунысь тунсыко удысчиосын но этнографъёсын пумиськонъёс, эскертэтъёс сярысь ас малпанъёстэ веранъёс.

Ӵектосэз радъясьёслэн валэктэмзыя, проектной кахатон – со экспериментъёслы аспӧртэмлыко площадка. Со луонлык сётоз малпаны но улонэ пыӵатыны выль ӵектосъёсты, кудъёсыз йӧслык лулчеберетэз, кылэз утёнын но азинтонын зол цифровой азинскон кылдытозы.
Проектной хакатонэз ортчытыны луонлык сётӥзы егитъёслэн ужъёсъя Федерал агенство но «Удмуртский игровой конструктор «КИКО» ӵектослэн авторез – Мелитина Охотникова, Алнаш ёросысь Муважи школаын 11-тӥ классын дышетскись.

Ужрад Удмурт Элькунысь тодосъя но дышетонъя министерстволэн, «Кванториум» нылпи технопарклэн но Удмурт Элькунысь Йӧскалык лыдӟетъюртлэн юрттэмзыя «Центр этнокультурного образования и социальных инициатив «АРТЭ» коммерциен герӟаськымтэ аскивалтӥсь огазеяськонэн радъяське.
Сӥё-дано усьтонэз 27-тӥ коньывуонэ 10.00 часын «Кванториум» нылпи технопаркын ортчоз.