15-тӥ-16-тӥ тулыспалэ Удмурт кун университетлэн библиотекаяз «Богомоловской лыдӟонъёс» Калыккуспо тодос конференция ортчоз. Ужрад сӥземын З. А. Богомоловалэн вордскем дырысен 95 ар тырмонэзлы.

З. А. Богомолова (1923-2012) – кылосбур тодосъя кандидат, тодмо литературовед, критик, дышетӥсь, Россиысь писательёслэн союззылэн ёзчиез, Удмурт АССР-лэн лулчеберет удысысьтыз дано ужась, Удмурт Элькунлэн Дано кунмуртэз, Эшъяськон орденлэн кавалерез. З. А. Богомолова кема аръёс ӵоже тыршиз Удмуртиысь гожъясьёслэсь, кылбурчиослэсь, суредасьёслэсь но крезьгурчиослэсь творчествозэс эскерон но калыке вӧлмытон ужын. Солэн «Песня над Чепцой и Камой», «Восхождение», «Как молния в ночи», «Река судьбы», «Неумолкнувшая песнь соловья» но мукет ужъёсыз вылӥ дунъямын вал Удмуртиысь но Россиысь тодосчиосын.

З.А. Богомоловаез буре вайыса конференцие люкаськозы Удмуртиысь, Пермь улосысь, Башкортостан, Марий Эл, Чуваш элькунъёсысь но Росиилэн мукет улосъёсысьтыз но кунгож сьӧрысь тодосчиос. Ужрадэ пыриськон вылысь вазиськон келязы 177 докладчикъёс. Лыдӟонъёсты усьтонын Удмурт Элькун Кивалтэтлэн З.А. Богомолова нимо преминыз пусъён ужрад орточз.

Конференциез радъяло Удмурт Элькунысь дышетонъя но тодося, Лулчеберетъя но туризмъя, Йӧскалык политикая министерствоос, Удмурт кун университет, Россиысь Наукаосъя академилэн Урал ёзэзлэн Эскеронъёсъя удмурт федерал центрез, Дышетонэз азинтонъя институт, Дышетон удысысь йӧскалык ужпумъёсты дышетонъя тодос институт, Удмурт Элькунысь йӧскалык лыдӟетъюрт, Нылпиослы но быдэ вуымтэослы элькун лыдӟетъюрт.