12-тӥ инвожое Ижкарысь Киров нимо паркын «Гербер» (0+) шулдыръяськон ортчиз. Таяз аре ужрад Кузебай Гердлы но Ашальчи Окилы 125 ар тырмонэн герӟаськемын вал.

Лыктэмъёслы ӟечкылан кылъёсын вазиськизы УЭ-ысь Кун Кенешлэн Тӧроезлэн воштӥсез Ишматова Татьяна, «Удмурт Кенеш» огазеяськонлэн тӧроез Андрей Ураськин, Ижкарысь Кар Думалэн тӧроезлэн воштӥсез Николай Швецов.

«Ваньмыз кутске асьме бордысь: кыӵе шаерын, кыӵе элькунын, кыӵе карын уломы. Талы луыса, туж потэ вылэм, шоркарын улӥсьёс элькунамы улӥсь мукет калыкъёслэсь сям-йылолъёссэс мед тодозы но утёзы шуыса. Элькунмес кылдытонын удмурт калык инъет луиз. Соос туж аспӧртэмлыкоесь, нош лулчеберетсы – уникальной луэ. Ми данъяськиськом, удмурт музъем вылын улӥськомы но со бадӟым Россиялэн люкетэз луэ шуыса», – пусйиз Татьяна Ишматова.

Валтӥсь сцена вылын кырӟазы-эктӥзы Ижкарысь коллективъёс но ансамбльёс. Соос пӧлын: «Танок», «Италмас», «Шулдыр Ӝыт». Озьы ик асьсэ ужъёсынызы калыкез паймытӥзы элькунысьтымы дизайнеръёс. Соос туала но вашкала удмурт дэремъёсын адӟытон дасязы.

«Удмурт дунне» газет «Лыдӟы удмуртсэ / Читай родное» площадка радъяз, отын котькуд мылкыд карись удмурт кылам-бурамез кылзыны быгатӥз. Егитъёсты витизы «Шунды» дэменлыклэн азбараз, гитара улсын кырӟаны, удмурт стендап кылзыны.

Быдэс нунал ӵоже ужазы киужъёсъя вузкарон-адӟытонъёс. Лыктэм куноос йӧскалык шудонъёсы, ӵошатсконъёсы, мастер-классъёсы пыриськизы, гурысь пӧсь табань но перепеч веръязы. Ӧз ортчы ужрадмы вӧсям ческыт ӝуктэк но! Праздник шулдыр эктонъёсын йылпумъяськиз, «Эктон КУАмын» этнодискотекаын асьсэды возьматӥзы Оксана Бисар но «Ӟечок» ӵошатсконлэн финалистъёсыз.

Тодады вайытоно, 2022-тӥ арын Кызьпу арамаын ортчись «Гербер» шулдыръяськонэ ог 3 сюрс адями вуиз. 17-тӥ инвожое Вотка ёросысь Пихтовка черкогурт котырын улосвылкуспо «Гербер» ортчоз.