12-тӥ инвожое 11:00 часысен 19:00 часозь Ижкарысь Киров нимо паркын «Гербер» (0+) шулдыръяськон ортчоз. Туэ ужрад Кузебай Гердлы но Ашальчи Окилы 125 ар тырмонэн герӟаськемын.

Валтӥсь сцена вылын кырӟалозы-эктозы Ижкарысь коллективъёс но ансамбльёс. Соос пӧлын: «Танок», «Италмас», «Шулдыр Ӝыт». Озьы ик асьсэ ужъёсынызы калыкез паймытозы элькунысьтымы дизайнеръёс. Соос туала но вашкала удмурт дэремъёсын адӟытон дасязы. «Удмурт дунне» газет «Лыдӟы удмуртсэ / Читай родное» площадка радъялоз, отын котькуд мылкыд карись удмурт кылэз кылзыны быгатоз. Егитъёсты витёзы «Шунды» дэменлыклэн азбараз, гитара улсын кырӟаны, удмурт стендап кылзыны.

Быдэс нунал ӵоже ужалозы киужъёсъя вузкарон-адӟытонъёс. Лыктэм куноос быгатозы йӧскалык шудонъёсы, ӵошатсконъёсы, мастер-классъёсы пыриськыны, гурысь пӧсь табанен но перепечен кунояськыны. Уз ортчы ужрадмы вӧсям ческыт ӝуктэк но! Праздник шулдыр эктонъёсын йылпумъяськоз.

Тодады вайытоно, 2022-тӥ арын Кызьпу арамаын ортчись «Гербер» шулдыръяськонэ ог 3 сюрс адями вуиз. Таяз аре лэсьтӥськон ужъёсын сэрен, кудӥз «Жилье и городская среда» ӵектосэн герӟаськемын, площадкаез воштӥзы.

17-тӥ инвожое Вотка ёросысь Пихтовка черкогурт котырын улосвылкуспо «Гербер» ортчоз.