18-тӥ оштолэзе Ижкарын ортчиз «Наследие Низами как источник развития восточной и мировой культуры» конференци.

Ужэрадэз ортчытон бордын тыршизы: Россиысь азербайджанъёслэн федерал автономизы, Лулчеберетэз но спортэз азинтонъя «Инкишаф» фонд, Удмурт Элькунысь йöскалык политикая министерство, Дышетон ужъюртъёслэн «Международный Восточно-Европейский университет» ассоциацизы, Удмуртиысь азербайджанъёслэн «Достлуг» мерлыко центрзы, Калыкъёслэн эшъяськон юртсы.

Конференци азьланьтӥз кылем арын мытэм проектэз, кудӥз нимаськиз «Азербайджан глазами российских студентов». Туэ ужрад паськытгес ортчиз, пыриськисез но тросгес вал. Лыдӟемын вал 25 доклад, кудъёсыз тодматӥзы Низами Гянджевилэн улон сюресэныз, ужъёсыныз. Тужгес но мур пуштросо докладэз вал Мамедов Солтан Искендер оглылэн, Низами нимо литературая институтысь тодосчилэн (Баку).

Дано куноос трос вал, соос пöлын: Агаев Галиб Шамсаддинович, Россиысь азербайджанъёслэн федерал автономизылэн Кенешсылэн ёзчиез, Гаджиев Тахир Султанович, Лулчеберетэз но спортэз азинтонъя «Инкишаф» фондлэн Президентэз, Бабаев Рафаэль Гюльмамедович, Россиысь азербайджанъёслэн федерал автономизылэн вице-президентэз. Палэнысь куноос сяна конференцие мылысь-кыдысь париськизы Удмурт Элькунысь мерлыко огазеяськонъёслэн кивалтӥсьёссы но ёзчиоссы.

Низамилэн ужъёсыз огазеяло пöртэм йöслыко адямиосты, угось со гожъялляз, вералляз ог-огдэ яратон, тупаса улон, ужез гажан сярысь. Нош та валатонъёс котькуд калыклэн улоназ валтӥсь луо.

Удмурт Элькунысь йöскалык политикая министрлэсь ужзэ быдэсъясь Лариса Николаевна Буранова тау кариз палэнысь куноослэн юрттэмзылы но асьме шаерамы лыктыны быгатэмзылы. Но конференцилэн дунлыкез но кулэлыкез вылӥ куноосын гинэ герӟаськемын öвöл. Валтӥсь кулэлыкез герӟаськемын югдытӥсен тодматсконэн, калыкъёслэсь эшлыко кусыпъёссэс юнматонэн, выль ужъёс бордын ӵошен ужаны луонлыкъёс кылдэмен.