2-тӥ оштолэзе Калыкъёслэн эшъяськон юртазы «Единая воля братских народов» нимо концерт ортчиз. Со сӥземын Россиысь но Белорусиысь калыкъёслэн огазеськонзылы. Ужрадэ пыриськизы Удмуртиысь йӧскалык-лулчеберетъя, мерлык огазеяськонъёсысь ёзчиос но вылӥ кивалтӥсьёс.

Максим Шумихин, Тӧролэн но Кивалтэтлэн Администрациезлэн кивалтӥсез, Александр Бречаловлэн но Президентлэн Александр Лукашенколэн шуркынмонэ пумиськемзы сярысь вераз. «Пумиськон улсын экономикая, гурт возёсъя юанъёс сэрттэмын-пертчемын вал. Тулыспалэ Ижкарын Союзо кунъёсты  утёнъя Парламент Кенешысь ӧрилэн пукетэз (заседаниез) ортчиз. Милям эшлыко, юн кусыпъёс кылдӥзы. Калыкъёслэн эшъяськон юртсы та ласянь бадӟым уж нуэ – элькунысь вань калыкъёсты котыраз люка.  Огинын ӵош тыршыса, котьку чылкыт инбам но яркыт шунды мед пиштоз йыр вадьсамы», – вераз Максим Шумихин.

«Ижкарлэн Тӧроез луыса, мон котьку но данъяськыса верасько кармылэн партнёръёсыз – Минск но Брест сярысь. Брестысь улосчиос мылысь-кыдысь асьме кадетъёсты пумитало, кудъёсыз Быдӟым Атыкай ожлы сӥзем синпелет интыосы вуыло», – йылтӥз на Олег Бекмеметьев.

Пыриськисьёслы ӟечкылан кылъёсын озьы ик вазиськиз Эдуард Петров, Удмуртиысь йӧскалык политикая министр: «Шуркынмонэ Белоруссиын Удмурт лулчеберетлэн нуналъёсыз ортчизы. Отын «Айкай» театр ассэ возьматӥз, пӧртэм мастер-классъёс ортчизы. Таӵе ужрадъёс кык вынлыко калыкъёслэсь юн эшъяськонзэс возьмато», – вераз министр.

Калыкез шулдыртӥзы «Айкай» театрысь артистъёс (соос Белоруссие гастрольёсын ӵем гинэ поталлямын), кырӟаны-эктыны быгатэмзэс возьматӥзы Ижысь искусствоосъя 2-тӥ номеро нылпи школаысь, крезьгуръя колледжысь студентъёс но дышетӥсьёс.

Ватсаны кулэ, Россиысь но Белоруссиысь калыкъёслэн огазеяськон нуналзы 1996-тӥ арысен пусйиське. Ӵапак соку та кунъёс эшъяськон сярысь огкыл гожтӥзы вал.