Удмурт Элькунысь йӧскалык политикая министерство «Пельняньлэн дунневыл нуналэз» фестиваль улсын «ТАУ» калык музейлы экспонатъёс люканы кутске.

«Кунмылэн историез кутске семьялэн историез бордысен. Тӥляд семьяяды возиське ке пельнянен герӟаськем ас киын лэсьтэм арбериды, оло пельняньдэс кутӥськоды пересь песянайдылэн дышетэмезъя, оло вань туспктэмды, кытын ваньды ӵошен кутиськоды пельнянь – та ваньмыз музейлэн экспонатэз луыны быгатэ. Кутӥськомы музеямы семьядылэн историезлэсь люкетсэ но шуиськомы Тӥлед «ТАУ», – валэкто ужрадъясьёс музей кылдытонлэсь мугзэ.

Арбериостэс ваёно таӵе адресъя интыяськем элькунысьтымы Йӧскалык политикая министерствое: Ижкар к., Ордженикидзе ур., 33 б юрт, 3 каб. Музей ужаны кутскоз 10-тӥ тулыспалэ.

Тодады вайытом, «Пельняньлэн дунневыл нуналэз» фестиваль радъяське 2015-тӥ арысен. Ужрад Russian Event Awards премиын кыкетӥ инты басьтӥз. 2016-тӥ арын «Пельменный уикенд» турмаршрут «Тужгес устоез туристической маршрут» номинациын нырысетӥ инты басьтӥз. 2017-тӥ арын Фестивале 35 сюрс адями выулӥз. Татын пуктэмын вал дунне рекорд – одӥг интыын сиемын вал 74 059 пельнянь, 7 тонна пельнянь вузамын вал.