Туннэ быдэс Россиын «Капля жизни» акция радъяське.

Ижкарын локальной ожгаръёсын быремъёслы синпелет дорын митинг ортчиз, кудӥз терроризмен нюръяськон нуналлы сӥземын.

Кун тӧрлыкысь но мерлык огазеяськонъёсысь огмуртъёс террористической актъёс дыръя, ужан долгзэс быдэстон дыръя быремъёсты буре вайизы но, кырым пыдэсъёсазы ву басьтыса, сяськаосты кисьтазы.

Ужрадэ пӧртэм конфессиосысь, ветеран огазеяськонъёсысь тунсыкчиос, кадетъёс, школаын дышетскисьёс, нылпи садысь пиналъёс пыриськизы.

Лыктэмъёслы ӟечкылан кылъёсын вазиськизы Ижкар Администраци Тӧролэсь ужзэ быдэсъясьлэн воштӥсез Вера Решетников, Ожысь, ужысь, ожутиськон кужымъёсысь но эрикрадъёсты утён ёзэсъёсысь ветеранъёслэн Ижкарысь кар мерлыко огазеяськонлэн кивалтӥсезлэн воштӥсез Сергей Панченко, Россиысь Удмурт Элькунъя Следственной комитетлэн кивалтонииысьтыз Ижкарлэн Октябрьской ёросэзъя следственной ёзэсысьтыз кивалӥсьлэсь ужзэ быдэсъясь Сергей Петров, Удмурт Элькунысь Кун Кенешлэн Тӧроезлэн воштӥсез Татьяна Ишматова, Удмурт Элькунысь йӧскалык политикая министрлэн воштӥсез Александр Филатов: «Туннэ ми музъемозь йыбырттӥськом соослы, кинъёс шаермес, матысь адямиосмес кышкытлыклэсь утё. Ми ум вунэтэ, котьку но тодамы возёмы со шимес учыръёты, соос уго аспӧртэм урок сёто, сак луыны косо».

«Капля жизни» акция 2018-тӥ арысен радъяське. Солэн кичӧлтӥсез Удмурт Элькунысь йӧскалык политикая министерство луэ.

Арысь аре пыриськисьёслэн лыдзы будэ. Таяз аре ужрад 78 улосвылъёсысь 1417 площадкаосын ортчиз, Донецкой Калык Элькунэз но лыдэ басьтыса.