12-тӥ южтолэзе «Татар кызы-2016» вожвылъяськонлэн финалэз ортчиз. Öтем куноос пӧлын Удмурт Элькунысь физкультурая, спортъя но егитъёсын ужан плитикая министр Игорь Краснов, Удмурт Элькунысь лулчеберетъя но туризмъя министр Владимир Соловьев, Удмурт Элькунысь йӧскалык политикая министерствоысь ӧнерчи Екатерина Чуракова, Удмурт Элькунысь бигеръёслэн йӧскалык автономизылэн кивалтӥсез Рамзия Габбасова, Быдэс дуннеысь бигер егитъёслэн форумзылэн тӧроез Табрис Яруллин.

Финалэ потӥзы 12 чеберайёс. Нылъёс нырысь ик асьсэ сярысь веразы, Резеда Сулейман дизайнерлэсь йӧскалык шӧмо диськутсэ возьматӥзы, «Семья – со шуд» темлы дасям эссэенызы тодматӥзы.

Котькуд нылаш быгатӥз ассэ возьматыны, котькудзэс жюри нимъёсын пусйиз. Вормисе потӥз Ижкарысь 21 аресъем Лиана Гайнутдинова. Лиана али 3 курсын Удмурт кун университетын юристлы дышетске. Творческой номере нылаш аслаз семьяез сярысь фильм дасям. Аслаз песянаеныз чош со бигеръёслэн сям-йылолъёсынызы тодматыны тыршиз. «Мынам самой бадӟым узырлыке – со мынам семьяе. Мон аслэсьтым улонме соостэк малпаны но уг быгатӥськы», – вера Лиана.