17-тӥ тулыспалэ Ижкарысь шор площадьын но тымет дурын Вӧй келян шулдыръяськон ортчиз.

Шулдыръяськонэз сӥё-дано усьтӥз но калыкез ӟечкылазы Удмурт Элькунысь Кивалтэтлэн Тӧроез Ярослав Семёнов, Удмуртиысь но Ижкарысь митрополит Викторин, Йӧскалык политикая министр Лариса Буранова, Ижкарлэн Тӧроез Юрий Тюрин.

Шор площаде Вӧй келяны элькунмылэн ёросъёсысьтыз 23 делегациос вуизы. Калыкез шулдыртӥзы ёросъёсысь вуэм коллективъёс. Куноос пӧртэм пумо калык шудонъёсын шудӥзы, хороводын бергазы, турлы табань сиизы. Йылпумъяськиз шулдыръяськон, дышем сямен, Масленча сульдэрез сутонэн.

Ужрадэз ортчытӥзы «УдмуртЭлькунысь ӟуч лулчеберетъя огазеяськон» мерлыко огазеяськон, Удмурт Элькунысь йӧскалык политикая министерство, Калыкъёслэн Эшъяськон юртсы но «Ижкар» муниципал кылдытэт.

Туспуктэм: Известия Удмуртской Республики