«Пельняньлэн дунневыл нуналэз» фестиваль улсын, котькуд ар сямен ик, туэ но карысьтымы сиськонниос но кафеоос куноослы пельнянь меню но нимысьтыз ӵектонъёс дасязы. Утчалэ соосты фестивальлэн пельменьфест.ру вотэсбамысьтыз но ВК группаысьтыз. Тужгес но кельшем мастер-классъёс понна одно ик куарадэс сётэ фестивальлэн вотэсбамаз. Тӥляд куарады кафеез яке ресторанэз матэгес кароз «Зарни пельнянь» премиез басьтонлы. Милям фестивальмы – со сиён-юонъёслэн историенызы но удмуртъёслэн лулчеберетэнызы тодматскон гинэ ӧвӧл, со котькуд мылкыд карисьлы дун тырытэк выль тодон-валанъёс, быгатонъёс, тодматсконъёс басьтыны луонлык но. Туэ Фестиваль улсын Пельнянь ӝытъёс радъяськозы. Пельнянь ӝыт – со тодон-валан, быгатон басьтон но со дыре ик шутэтскон вылысь радъям пумиськон. Татын тӥ быгатоды выленыз тодматскны, эшъёсыныды яке семьяеныды шулдыр ӝыт ортчытыны. Мастерскойёс ужалозы 1-9-тӥ тулыспалэ, отчы пыриськон понна азьпаласен пусйиськоно.

Ческыт но чебер – сиён-юонъёсты туспуктонъя но шеф-поварлэн кивалтэмез улсын пельнянь кутонъя мастер-класс. Ӝытлэн пумаз эскеромы кинлэн умойгес пӧрмем пельнянь кутонэз но ческыт пельнянез чебер туспуктыны.

Пельнянь диета – веськрес луон но шонер сиськон сярысь мастерской.

Визьсынан мастерской – визьбур шудон. Татын пельняньлы, удмурт кыллы сӥзем тунсыко юанъёслы валэктон сётъяно луоз.

Выжыкыл пельнянь — анай-атайёслы но нылпиослы удмурт писателен но суредаськисен пумиськон ӝыт. Писатель мадёз удмурт калык фольклор сярысь, нош суредась выжыкыллы суред лэсьтыны дышетоз.

Пельнянь кузьым – К.Герд нимо йӧскалык музейлэн ӧнерчиосыз ас киыныды синпель лэсьтыны дышетозы.

Пельнянь Вернисаж — 2 час куспын шеф-поваръёс куноос понна пӧртэм выжыысь калыкъёслэсь пельнянь выллем сиёнзэс пӧралозы.

Та но мукет ужрадъёс сярысь пыр-почгес тодыны луоз Фестивальлэн группаяз vk.com/pelmenfest но вотэсбамаз пельменьфест.рф