4-тӥ куартолэзе Быдӟым Атыкай ожын вормемлы 69 ар но Беларусез немецъёслэсь мозмытонлы 70 ар тырмемлы сӥзьыса ортчоз аспöртэмлыко ужрад. Ижкарысь студентъёс бызьыса мынозы Минскозь. Бöрысь соос борды итӥськозы Чебоксарыысь, Нижний Новгородысь, Волгоградысь, Севостопольысь но Казаньысь студентъёс.

Таӵе калыккуспо ужрад радъяське ини 11 ползэ. Асьме элькунын сое радъян бордын ужало балорус лулчеберетъя «Батьковщина» мерлыко огазеяськон но М.Т. Калашников нимо Ижкарысь техникая кун университет. Студентъёс пыриськозы пöртэм интыосын Вормон Нуналлы сӥзем митингъёсы.

Йылпумъяськоз ужрад 8-тӥ куартолэзе Минскын, Данлыклы сӥзем Курганын.

1977-тӥ арысен Механикая Ижкарысь интститутысь студентъёс но дышетисьёс, ветеранъёс арлы былдэ странаысь кудаз ке город-герое вуылӥзы. 2003-тӥ арын та мытэм уж нош ик улӟытэмын вал. Табере ужрадлэн географиез но паськытаз.