Туннэ Йӧскалык политикая министерствоын министрлэн но Мерлык кенешлэн кичӧлтэмзыя яланлыко ужась совещанилэн кенешонэз ортчиз.

Йӧскалык-лулчеберетъя огазеяськонъёсысь кивалтӥсьёсын ӵош 2022-тӥ аре быдэстэм ужъёсты эскеризы. Мерлык огазеяськонъёслэн ӵектос удысын тыршыса ужамзылы йылпумъянъёс лэсьтӥзы.

Министр Эдуард Петров докладэныз тодматӥз. Эдуард Степанович пусйиз, йӧскалык-лулчеберетъя огазеяськонъёслэн трос выль ӵектосъёссы кылдо шуыса.

«Адске, будон вань. Кылсярысь, 2021-тӥ арын асьме удысъя 34 ӵектос вормисе потӥз но 22,5 миллион манет утӥз вал. Нош таяз аре коммерциен герӟаськымтэ мерлыко огазеяськонъёслэн йӧскалык политика удысъя ӵектосъёссы полысь 55-ез ӵектос вормиз но оглом ог 37 миллион манет басьтӥз. Озьы ик пусйыны кулэ вӧсьбур огазеяськонлэсь кыксэ ӵектоссэ, кудъёсыз 1 миллион манет вормизы», – вераз Эдуард Петров.

Огинэ кариськыса эскеризы коммерциен герӟаськымтэ огазеяськонъёслэсь толшоре-тулыспалэ 2023-тӥ арын ортчытоно ужрадъёссэс.

Ужрадлэн пумаз министр Эдуард Петров вуоно праздникъёсын ӟечкылаз.

Со сяна, коммерциен герӟаськымтэ мерлыко огазеяськонъёслэн кивалтӥсьёссылы дэмламын вал асьсэлэн огмуртъёссылы вераны, Выль арез пумитан дыръя чакласькыса мед улозы шуыса.