10-тӥ пӧсьтолэзе Удмуртиын «Маршрут построен! Удмуртия многонациональная!» йӧскалыккуспо блог-тур йылпумъяськиз. Та ӵектосэз Калыкъёслэн Эшъяськон юртсы радъя «Росмолодёжь.Гранты», Лулчеберет кичӧлтонъёсъя Президентлэн фондэз, УЭ-ысь йӧскалык политикая министерство юрттэмен. Таӵе этнической туризмез азинтӥсь ужрадъёс пыр Удмурт Элькун трос адямиосты бордаз кыскыны тырше – «Туризм но куно карон» йӧскалык ӵектослэн валтӥсь ужпумез луэ.

Ужрадэ пыриськизы Удмуртиысь трос йӧскалыккуспо егит калык: Нарине Манукян, Ирина Кожевникова, Альбина Бронникова, Мехрзод Джураев, Анна Кустова, Светлана Тронина, Ксения Широбокова, Станислав Муклин, Александр Ильин но Джонибек Махкамов. Ваньзы соос элькунмылэн пӧртэм люкетъёсысьтыз.

8 нунал куспын 11 этноблогеръёс гуртъёсы но черкогуртъёсы вуылӥзы – элькунамы улӥсь калыкъёслэсь лулчеберетэнызы тодматскизы. Нырысь егитъёс Глаз ёросысь Пӧжы гуртэ мынӥзы – уйпал удмуртъёсын тодматскизы. Собере Балезино ёросысь Кестым гуртын бигер лулчеберетэз эскеризы. Азьланьтӥзы ужрадзэс Юнды черкогуртын бесерманъёс но Сергино черкуогуртын ӟучъёс дорын.

Егитъёсты лымшор удмуртъёс Кияса ёросысь Уддяди гуртын возьмазы, нош Грак ёросысь Бадӟым Вожой гуртын – поръёс. Собере Грак ёросысь Благодатной гуртын чувашъёслэн лулчеберетэнызы тодматскизы, нош Порым гуртын – кряшенъёслэн сям-йылолъёсынызы.

Котькудӥз гурт мар ке но выльзэ усьтӥз: аспӧртэмлыко ӧнеръёс, кырӟанъёс, сям-йылолъёс, йӧскалык сиён-юон. Котькуд нунал блогеръёсты шумпотыса пумитаз гурт калык.

Со сяна, ӵектос улсын ӧнерчиос гурт калыклы юрттӥз: Юнда черкогуртын ошмесъёсты чебермаз, Уддяди гуртын Пересьёслэн нимысьтыз юртазы утялскизы, Кестым гуртын – ческыт мильым пыжизы но концерт дасязы, Грак ёросын турым октӥзы, пу тырылӥзы но мукет.

Ужрад куспын 7 шоуослы трос тунсыко материал люкамын – УЭ-ын улӥсь калыкъёслэн гуртын улэм-вылэмзы, сям-йылолъёссы, лулчеберетсы сярысь. Ог люкетэз ӵектослэн нимлыко вотэсбамаз поттэмын ни, озьы ик ӧнерчиослэн мер вотэсбамъёсазы. Мукет люкетэз потыны дасяське на.

«Маршрут построен! Удмуртия многонациональная!» ӵектос сярысь пыр-почгес – https://udmurtgo.ru/#rec1025812566 вотэсын но «ВКонтакте» мер вотэсын: https://vk.com/club230457395