22–26-тӥ гудырикошконэ Москваын егит ӧнерчиослы сӥзем «Профессионалы.РФ» Россиякуспо форум радъяське. Со герӟаськемын кун йӧскалык политикаез быдэстон ужен.

Ужрадэ Россиысь 72 улосвылъёсысь тунсыкчиос пыриськизы. Удмуртиысь форуме вуылӥзы Подлевских Роман, Эграысь Калыкъёслэн эшъяськон юртысьтызы этнокультурной азинтӥськонъя ёзэтлэн кивалтӥсез, но Мария Векшина, Йӧскалык прессалэн юртысьтыз маркетинг ёзэтлэн кивалтӥсез.

Россиысь ФАДН-лэн кивалтӥсезлэн советникез Айказ Микаелян, Россиысь Калыкъёслэн юртэзлэн директорез Анна Полежаева но йӧскалык кусыпъёсъя Ресурсной центрлэн директорез Евгения Михалева пыриськисьёсын мылысь-кыдысь кенешизы, шугъяськытӥсь юанъёслы валэктонъёс шедьтӥзы.

Анна Полежаева пусйиз: «Туннэ нуналлы туж кулэ быгатыны кылзыны ог-огдэ, пӧртэм выль кутсконъёсын но ужъёсын ог-огедлы юрттыны. Соин ик ми кылдытӥмы «Лучшее в общее» площадкаез, кудӥз юрттоз тӥляд тужгес но ӟеч практикаостылы администраци но коньдон ужпумъёс ласянь. Ми дэмласькомы саклык висъяны калыкъёслы но улосвылъёслы сӥзем ӵектосъёс вылэ. Ми гажаськом Россиысь котькуд калыкез, солэсь аспӧртэмлыксэ но лулчеберетсэ, но туннэ нуналэ асьмелы огазеяськыны кулэ. Ӵапак таӵе проектъёс бадӟым инты басьто вожвылъяськонын. Россиысь калыкъёслэн юртэзлы, мае ке аслэсьтыззэ лэсьтон сяна, туж кулэ паськытатыны тӥлесьтыд кичӧлтонъёсстэс но соосты быдэс Россилы тодмо карыны. Ваньмылэн асьмелэн одӥг огъя ужпуммы – кун йӧскалык политика валамон но кылэмын мед луоз».

«Лучшее в общее» вожвылъяськонэз Россиысь ФАДН-лэн, йӧскалык кусыпъёсъя Ресурсной центрлэн юрттэмзыя Россиысь Калыкъёслэн юртсы ортчытэ.

Вожвылъяськонлэн ужпумез – калык кусыпъёс удысысь кулэ луись ӵектосъёслы юрттон но азинтон. Соос огъя кунмурт индентичностез юнматонлы, этнокультурной но кыл аспӧртэмлыклы юрттонлы, экстремизмез, йӧскалык но религиос вискысь керетонъёсты палэнтонлы сӥземын.

Заявка келяны луонлык вань Россиысь Калыкъёслэн юртэзлэн вотэсбамаз 24-тӥ куарусёнозь.