26-тӥ тулыспалэ Ижкарысь «Арена» спорт коворкын йӧскалык-лулчеберетъя огазеяськонъёс вискын XV мини-футболъя чемпионатэ ог 340 адями пыриськиз.

Ӵошатскон кутскиз командаосты тодматонэн, соос пӧлын кылем арын вормисьёс но вал – «Батьковщина» Удмуртиысь белорус лулчеберетъя огазеяськонысь но «Ак чәчәкләр» («Тӧдьы сяськаос») Ижкар эмакадемиысь спортсменъёс. Ӵошатсконлы мылкыдэз ӝутӥзы «Двин» ансамбльысь барабанщикъёс но «Бриоль» гимнастикая центрысь дышетскисьёс.

Турнире 7 йӧскалык-лулчеберетъя огазеяськонъёсысь ёзчиосын 19 команда пыриськиз. Соос пӧлысь тямысэз команда кунгож сьӧрысь студентъёслэсь кылдытэмын вал, кудъёсыз УдГУ-ын, М.Т. Калашников нимо ИжГТУ-ын, эмакадемиын но Россиысь Калык эшъяськон университетын дышетско. Тужгес но тунсыко, «ИжТех» командае 6 пӧртэм улосвылъёсысь кунгожсьӧр спортсменъёс огазе люкаськизы.

Со сяна, пӧртэм йӧскалыкъем «Дружба народов» но «Друзья Миннаца» командаос ӵошатскизы. Озьы ик Калыкъёслэн Эшъяськон юртысьтыз но Йӧскалык политикая министерствоысь ужасьёс пыриськизы.

Вормисе потӥзы таӵе командаос:

I инты – «Куара» Ресурсной центр» команда

II инты – «Дружба народов» команда

III инты – «Иман» Удмуртиысь егит бигеръёслэн Союзысьтызы команда

Тужгес но умой шудӥсьёс пӧлын «Куара» командаысь Иван Зайцев пусъемын, тужгес но умой вратарь – «Иман» командаысь Рустам Хакимов, тужгес но ӟеч юрттӥсьёс – «Друзья Миннаца» командалы дурбасьтӥсьёс.

Тодэ вайытоно, котькуд ар ӵошатскон «Урарту» Удмуртиысь армянъёслэн мерлык огазеяськонзылэн кичӧлтэмезъя радъяське но сӥземын Александр Александрович Волковлы, Удмурт Элькунлэн нырысетӥ Президентэзлы.