Вань сюлмысьтымы ӟечкыласьком Удмурт Элькунысь изданиосты та праздникен! Тӥляд вань сюлмысь тыршемды, мыло-кыдо ужамды асьме элькунмылы дунъяны луонтэм узырлык луэ. Тӥ котькуд нунал удмурт кылэз утиськоды, азинтӥськоды, калык пӧлы вӧлмытӥськоды!

Праздниклэн историысьтыз:

14-тӥ толсуре 2020-тӥ аре поттэм 81-РЗ номеро УЭ-лэн Катэныз «О праздничных днях и памятных датах Удмуртской Республики» Удмуртиын 4-тӥ тулыспал праздник шуыса пусъемын – Йӧскалык печатьлэн нуналэз.

4-тӥ тулыспалэ 1915-тӥ аре удмурт кылын «Войнаысь ивор» («Вести с войны») газетлэн нырысетӥ номерез потӥз. Со йӧскалык печатьлэсь историзэ кутскиз. Туннэ та газет «Удмурт дунне» («Удмуртский мир») нимын поттӥське но 110-тӥ котырес лыдпуссэ пусъе!

Тунна нунал понна Удмуртиын газетъёс но журналъёс куинь кылын печатласько – удумрт, ӟуч но бигер. Удмурт кылын 6 элькун газет но журнал потэ, одӥг ёроскуспо газет: «Удмурт дунне» («Удмуртский мир»), «Ӟечбур!» («Здравствуй!») нылпи газет, «Иднакар» («Город Идны») ёроскуспо газет но журналъёс: «Кенеш» («Совет»), «Кизили» («Звездочка»), «Инвожо» («Солнцеворот»), «Вордскем кыл» («Родное слово»).

Элькунлэн 11 ёросаз ёроскуспо газетъёс борды удмурт кылын ватсэтъёс поттӥсько на (Алнаш, Вавож, Дэбес, Дэри, Эгра, Кияса, Пичи-Пурга, Можга, Ува, Шаркан, Якшур-Бӧдья).

Кык радиостанциос но кык телеканалъёс удумрт кылын программаос дасяло. Озьы ик удмурт кылын телевидениез ДАУР ТВ-ын адӟыны луэ. Куинь кылын «Удмуртия» ивортодэтъя агентство ужа. Бигер кылын радио, телевидение вань но «Янарыш» газет печатлаське.

Тау тӥледлы удмуртлыкез улонэ пыӵатэмды понна! Сӥзиськом трос ӟеч иворъёс, лыдӟисьёстылэсь йылэмзэ, выль вормонъёс!