3-тӥ коньвуонэ УЭ-ысь йӧскалык политикая министерстволы 30 ар тырмиз. Талы сӥзьыса Калыкъёслэн Эшъяськон юртазы сӥе-дано ужрад ортчиз, кудаз министерстволэн ужасьёсыз, удыслэн ветеранъёсыз, йӧскалык лулчеберетъя но вӧсьбур огазеяськонъёслэн огмуртъёссы, партнёръёссы-эшъёссы пыриськизы.

Та удыс элькунын 90-тӥ аръёсы кылдӥз. Пӧртэм йӧскалык огазеяськонъёсын ужан понна нырысь ик кылкутӥз Удмуртиысь Кивалтэт бордысь Комитет. Собере со Комитет министерстволы пӧрмиз. Ӧнерчиос азьын котьку дыре сылӥзы таӵе ужпумъёс – улосвыллэсь лулчеберет узырлыксэ утьыны но азинтыны, пӧртэм этносъёсын огазьын эшъяськыса улон понна луонлыкъёс кылдытыны.

«Удмуртиын 130-лэсь трос йӧскалыкъёс уло, ваньмыз сямен валтӥсь вӧсьбуръёс ужало. Дышетон, мерлыко, патриотизм мылкыдо но мукет ӵектосъёс пыр возьматэмын асьмелэн огинлыкмы, соос бадӟым пайда ваё, мед асьмеос огкылысь, тупаса уломы шуыса. Ваньзэ тае пиналъёсмылы пыӵатыны кулэ, кунмылэн вуоноез угось соослэн дунлыкъёсынызы герӟаськемын», – вераз УЭ-ысь йӧскалык политикая министр Эдуард Петров.

Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев УЭ-ысь Тӧролэн Александр Бречаловлэн нимыныз куноосты ӟечкылаз:

«Берпуметӥ кык ар куспын Калыкъёслэн Эшъяськон юртысьтызы ужасьёс вормизы пӧртэм грант вожвылъяськонъёсын 16 миллион манетлэсь трос. Со 12 ӵектосъёс, кудъёсаз оффлан но онлайн амалъёсын 100 сюрс адями пыриськиз: егитъёс но, мӧйыос но, Удмуртиын улӥсьёс но, мигрантъёс но. Тау ваньзылы, кудъёсыз котькуд нунал элькунамы тупаса улон понна тыршо. Россилэн кужмыз – огкылысь улонын, ӵошен аьмеос сям-йылолъёсмес утиськомы».

Ӧтем куноос пӧлын министерстволэн азьвыл кивалтӥсьёсыз но вал – Евразиысь но Африкаысь калыкъёслэн Ассамблеязылэн Генеральной Советэзлэн Председателез, Россия Федерациысь Президентэз бордысь йӧскалык кусыпъёсъя Советлэн ёзчиез, «Россиысь калыкъёслэн ассамблеязы» россиякуспо мерлыко кун огазеяськонысь Советлэн ёзчиез Светлана Смирнова.

«Туннэ бадӟым ӧнерчиослэн ужаменызы, юрттэменызы элькунын таӵе ӟеч йӧскалык климат кылдэмын. Та командае пыро миннацлэн ужасьёсыз, 40-лэсь трос йӧскалык-лулчеберетъя огазеяськонъёс, Удмуртись Калыкъёслэн Эшъяськон юртсы но тямыс ёросысь Калыкъёслэн Эшъяськон юртъёссы но со выллем огазеяськонъёс. Арлы быдэ 300-лэсь трос пӧртэм ӵектосъёс улонэ вӧлмо. Удмурт Элькунлэсь йӧскалык политикаез умой радъямез сярысь Россиысь улосвылъёсын но, кунсьӧрын но тодо», – пусйиз со.

Со сяна, ӧнерчиос, йӧскалык лулчеберетъя но вӧсьбур огазеяськонъёслэн огмуртъёссы нимысьтыз ожгар операцие пыриськисьёслы но семьяоссылы юртто. Соос гуманитар юрттэт лэсьто, йӧскалык синпельёс, нылпиослэсь гожтэтъёссэс ысъяло.

Россиысь йӧскалык ужъёсъя Кун Думалэн ёзчиез («Единая Россия» фракция) Лариса Буранова пусйиз: Удмуртиысь миннац – нырысь ик со адямиос, тупаса улонэз утисьёс. «Бадӟым огмылкыдъем коллектив, кудаз пыро йӧскалык-лулчеберетъя но вӧсьбур огазеяськонъёс, странаысьтымы тужгес но устоез Калыкъёслэн Эшъяськон юртсы, кар но ёрос администрациосысь ужасьёс, тодосчиос, эксперт огинлыкъёс, школаос, лулчеберет юртъёс. Миннацмылэн таӵе ӵектосъёсыз: Бадӟым этнографической диктант, Брангуртысь песянайёсын кылъя уж, Пельняньлэн калыккуспо нуналэз, «Капля Жизни» акция – быдэс Россия понна сӥё-дано ужрадъёс луизы ни. Нош тыршеммылэн тужгес но бадӟым пайдаез потэ нуналысь нуналэ ужамысь, куддыр со син шоры уг йӧты ке но», – вераз со.

Ужрадлэн пумаз куноослы книга адӟытӥзы, кудӥз министерстволэн 30 ар тырмонэзлы сӥземын. Книгаын Удмуртиысь йӧскалык поликалэн узыр историез люкамын.