15-тӥ оштолэзе Можгакарысь «Дубитель» лулчеберетъя юртын «Удмуртия – вместе!» интывыл огинъёслэн форумзы (0+) ортчиз. Отчы люкаськизы 140-лэсь трос асмылкыдчиос, йӧскалык-лулчеберетъя огазеяськонъёслэн кивалтӥсьёссы, мерлык кенешъёсысь, медиы удысысь ёзчиос но 9 муниципал кылдытэтъёсысь тӧроос: Можгакарысь, Можга, Алнаш, Грак, Кизнер, Ува, Вавож, Сьӧлта, Сюмси ёросъёсысь.

УЭ-лэн Тӧролэн нимыныз форуме пыриськисьёсты Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев ӟечкылаз. Со пусйиз, таӵе ужрадъёс – ӟеч луонлык коммерциен герӟаськымтэ мерлык огазеяськонъёс понна ӵектосъёсты но ужрадъёсты эскерыны, кыӵе шуг-секытъёс но луонлыкъёс кылдо проектъёсты улонэ вӧлмытыку.

«Та удысын грантъёсын ужанъя бадӟым саклык висъяло огазеяськонъёс, йӧскалык-лулчеберетъя огазеяськонъёс. Оскисько, котькудӥз тӥ пӧлысь заявка гожъяз яке ӵектосэз улонэ вӧлмытыны юрттӥз ни шуыса. Пусйытэк уг кельты Сьӧлта но Ува ёросъёсты – элькунлэн шундыпуксён люкетызлэн азьмынӥсьёсыз Азьмуртлэн фондысьтыз юрттэт утонъя. Тау ваньдылы таӵе уж нуэмды понна, ваньзылэн луонлыкез вань азьлань мыныны», – вераз Александр Журавлев.

Со пусйиз, форумлэн интыез юнме быръемын ӧвӧл шуыса. «Дубитель» лулчеберетъя юрт но ужасьёсыз 8 ар ӵоже «Единая Россия»-лэн «Культура малой Родины» федерал ӵектосаз пыриське. Та дыр куспын учкон, касса залъёс, фойе, гардероб, юртлэн вылтусыз тупатэмын. Таяз аре выльдӥськон ужъёс азьланьтӥськиз – выль уж тӥрлыкъёс басьямын луозы.

Форумын вераськизы Удмурт Элькунысь Кун Думаысь депутатъёс Олег Гарин но Лариса Буранова.

Йӧскалык политикая министр Эдуард Петров аслаз докладаз пусйиз, Можгакарын но элькунлэн «шундыпуксён люкетызлэн» мукет муниципал кылдытэтъёсын мыло-кыдо тыршо «Удмурт Кенеш», Ӟуч лулчеберетъя огазеяськонъёслэн ёзчиосыз, бигер, пор, казак, армян но егитъёслэн йӧскалык-лулчеберетъя огазеяськонъёслэн огмуртъёссы.

«Йӧскалык-лулчеберетъя огазеяськонъёс ӵем ортчыто дышетон, этнокультура удысъя ужрадъёс, кудъёсыз тупаса улонэз кылдытыны юртто. Озьы ик патриотизм мылкыдэн пачылмем ӵектосъёсты улонэ вӧлмыто: «Память поколений», «Патриотическая школа: Звучи Набат», «Эхо памяти: Музыкально-театрализованный спектакль к 80-летию Великой Победы», «Интерактивный музей Герои среди нас» но трос мукет».

Форумын пыриськисьёслы пӧртэм ӧръёсъя площадкаос радъяськизы. Ваньзы соос туж пайдалыкоесь, тунсыкоесь вал.

УЭ-ысь Мерлык палаталэн ёзчиосыз Степан Чирков, Раиль Галиахметов, Татьяна Кунгурова но Дмитрий Выдрин форумын экспертъёс но радъясьёс луыса ужазы. Котькуд ӧръя малпанъёс лэсьтэмын, кудъёсызъя азьланяз уж нуиськоз.

Вуоноез форум 18-тӥ оштолэзе Глазкарын радъямын луоз. Со Удмуртиысь уйпал люкетэз герӟалоз. Азьланьтӥське регистрация форуме, кудӥз 23-тӥ оштолэзе Сарапулын ортчоз.

«Удмуртия – вместе!» интывыл огинъёслэн форумъёссэс радъяло Калыкъёслэн Эшъяськон юртлэн луонлыкъёсъя центръёсыз но Удмуртилэн Мерлык палатаез УЭ-ысь йӧскалык политика министерстволэн но Йӧскалык ужъёсъя федерал агентстволэн юрттэменызы.