10-тӥ инвожое журналистъёслы«Информационное сопровождение реализации государственной национальной политики и проблемы межэтнической тематики в российских СМИ» нимо семинар ортчиз.

Куноослы пумитан кылэн вазиськиз Удмурт Элькунысь йöскалык политикая министрлэсь ужзэ быдэсъясь Л. Н. Буранова. Со вераз элькунын йöскалык ужпумъёслы сӥзем ужрадъёс, ӵектосъёс сярысь. Озьы ик ивортӥз Калыкъёслэн эшъяськон юртазы Ванёсъёсъя центр кылдытэмын луоз шуыса. Та малпанэз вылӥ дунъяз но азинтӥз Россиысь калыкъёслэн ассамблеязылэн тöроез С.К. Смирнова.

Семинарез нуиз Лянге Маргарита Арвитовна, Журналистъёслэн йöскалыккуспо гильдизылэн президентэз, Россиысь калыкъёслэн ассамблеязылэн тöроезлэн воштӥсез. Вераськоназ калык кусыпъёс удысысь лэчыт юанъёсты ӝутӥз. Семинаре пыриськисьёслы луонлык сётӥз асьсэлэсь ужъёссэс Россиысь мукет журналистъёслэн ужъёсынызы ӵошатыны, юанъёссылы валэктон сетӥз.

Маргарита Арвитовна нимысьтыз пусйиз журналист гожъяськон темазэ мур тодыны кулэ, одӥг интыяз сылыны кулэ öвöл, ассэ азинтыны кулэ шуыса. Лыдӟисез тунсыкъяськытон сяна вунэтоно öвöл солы тодон-валан сётон сярысь но.

Малькова Вера Константиновна, история тодосъёсъя доктор, Этнология но антропология институтысь Этнополитика эскеронъёсъя центрысь валтӥсь тодос ужчилэсь ужзэ быдэсъясь вераз аслаз эскеронъёсыз сярысь. Туннэ нунал понна Россиысь улосъёсысь журналистъёслэн öвöл огъя страегизы. Со бордын рос-прос ужано öнерчиослы.

Семинарлэн практической люкетаз журналистъёс йöскалык темая дасям проектъёсынызы тодматӥзы. Кин ке но ӵектӥз кылдытыны «Россиысь калыкъёслэн азьветлӥсьёссылэн огазеяськонзы» мерлыко огазеяськон, мукетыз вераз этнокалендарь лэсьтон сярысь мылкыдъёссэ, кинлэн ке но Ижкарын пöртэм йöскалык азбаръёсын гуртэз адӟемез потӥз.

Семинаре пыриськисьёслы нимысьтыз уж но сётэмын вал. Озьы соос гурт Сабантуй сярысь сюжет малпазы, Мускоысь нылпи ваён юрт сярысь спецрепортаж дасязы, Ижкарысь этно-парк сярысь малпанъёссэс веразы.

Семинар йылпумъяськем бере журналистъёс ӵектӥзы Журналистъёслэсь йöскалыккуспо гильдизылэсь ёзэтсэ асьме шаерамы но усьтыны.