25-тӥ тулыспалэ Удмурт Элькунысь йӧскалык политикая министерстволэн йылпумъян Коллегиез ортчиз. Ужрадэ пыриськизы министерствоосысь, муниципал кылдытэт администрациосысь ӧнерчиос, мерлыко огазеяськонъёслэн ёзчиоссы.

Удмурт Элькунысь йӧскалык политикая министерстволэн 2015-тӥ арын ужезлы йылпумъян лэсьтӥз но 2016-тӥ арын луоно ужъёс сярысь вераз министр Л.Н. Буранова. Лариса Николаевна нимысьтыз пусйиз Удмуртиын пӧртэм выжысь но пӧртэм инмарлы оскись калыкъёслэсь куспазы тупаса, ог-огзэс валаса-гажаса улэмзэс. Тӧрлык ёзэсъёсын но мерлыкен лэсьтэм ужъёс калык кусыпъёсты син шорын возьыны юртто.

Л.Н. Бурановаен ӝутэм темаез азьланьтӥз Калыкъёслэн Эшъяськон юртсылэн кивалтӥсез Т.П. Боталова. Татьяна Павловна ивортӥз ужъюртлэн ресурс центр луэмез сярысь но соин ӵош ужан ораз куд-ог воштӥськонъёс сярысь. Али бадӟым саклык висъяське ӵектосъёсты дасянлы но соосты быдэстонлы. Озьы ик Калыкъёслэн Эшъяськон юртсы азьын выль ужпум – ивортодэтъя но эскеронъя центръёслэсь ужзэс радъян.

Муниципал кылдытэтъёсысь но докладъёс вал. Удмурт Элькунысь йӧскалык политикалэн методика но коньдон ласянь юрттэменыз 2015-тӥ арны ортчытэм ужрадъёс сярысь ивортон лэстӥзы но азьпалан ӵош ужаны осконзэс веразы Шохина Елена Леонидовна, «Электрон лулчеберет дворец – Йӧскалык лулчеберетэз улӟытонъя но азинтонъя центр» лулчеберет ужъюртлэн кивалтӥсез но Шнейдер Гульнара Венеровна, «Дэри ёрос» муниципал кылдытэт администрацилэн кивалтӥсез.