21-тӥ толсуре Калыкъёслэн Эшъяськон юртазы «Освещение межэтнических отношений в средствах массовой информации» нимо семинар ортчиз.

Семинаре улосысь 40-лэсь уно журналистъёс пыриськизы. Ужрадлэн валтӥсь адямиез луиз Маргарита Арвитовна Лянге, Россиысь калыкъёслэн ассамблеязлэн кивалтӥсезлэн воштӥсез, Россия Федерациысь йӧскалыккуспо журналистикая гильдилэн президентэз.

Семинарез усьтӥз но люкаськем журналистъёслы азинлыко уж сӥзиз Удмурт Элькунысь йӧскалык политикая министрлэн нырысетӥ воштӥсез – Орлов Павел Анатольевич. Со пусйиз макем журналистъёслы йӧскалык кусыпъёс сярысь быгатыса, валаса вераны кулэ. Угось ивор вӧлмытон сӧзнэтъёс калыклэсь соиз яке таиз юан, учыр шоры учконзэ кылдыто.

Сергей Флорович Васильев,Печатья но ивор волмытонъя агентсволэн кивалтӥсезлэн воштӥсез, Павел Анатольевичлэсь верамзэ азьланьтыса усьтӥз на йӧслыкез утён темалэсь, палэнысь лыктэм калыкъёслы интыысь калыкъёслэсь сям-йылолъёссэс, лулчеберетсэс гажан мылкыд пычатонлэсь кулэлыксэ.

Семинарын «Аргументы и факты в Удмуртии» газетлэн «Легенды родникового края» ӵектосэн тодматскон ортчиз. Ӵектосэз быдэстиыны юрттэ Калыкъёслэн Эшъяськон юртсы (Татьяна Михалёва – ӵектослэн кивалтӥсез). Газетлэн бамъёсаз улосчиосмы тодматско мерлыко огазеяськонъёсын. Газетлэн валтӥсь редакторезлэн Юлия Ардашевалэн кылъёсызъя, мерлыко огазеяськонъёс туж пӧртэмесь, но соосты огазея калыкез гажан, котькудзылэн верамзы потэ калыксылэн сям-йылолъёсыз, сиён-юонъёсыз сярысь. Вуоно арын ӵектосэз азьланьтыны малпамын.

Семинарлэсь валтӥсь люкетсэ Маргарита Лянге нуиз. Доклад лыдӟонъяз М. Лянге журналистъёсын кенешылӥз, юанъёссылы валэктонъёс сётъяз . Калыкез лыдъянлэсь йылпумъянъёссэ лыдэ басьтыса, Йӧскалык журналистикая гильдилэн кивалтӥсез Удмуртиысь журналистъёслы тыро-пудо валэктӥз кызьы трос калыкъем улосын йӧскалык кусыпъёсты югдытоно, мар сярысь верано, кызьы ТV сюжет лэсьтоно.

Егит адямиослэсь улон шоры учкемзэс кылдытон, вотэсын шонер но кулэ луись ивортодэтэз вӧлмытон сярысь вераз Удмурт Элькунысь йӧскалык политикая министр Лариса Николаевна Буранова.

Семинар улсын ик мерлыко реклама кылдытонъя «Народов много, страна одна! Этно украшает» вожвылъяськонын вормисьёсты данъян ужрад но ортчиз. Вераны кулэ, вожвылъяськонэ Приволжской федерал округысь 100-лэсь ятыр адями пыриськиз.Ужъёс вуэмын вал Оренбург, Саратов, Ульяновск, Пермь улосъёсысь, Татарстан, Марий Эл, Чуваш элькунъёсысь. Жюри бырйиз соос пӧлысь тужгес но устоосэ.

Вормисьёсты ӟечкылакуз, Л.Н Буранова пусйиз ужрадэ егитъёслэсь пыриськемзэс. Озьыен, егитъёс малпасько калык кусыпъёсты юнматон сярысь, сюлмасько тупаса улон сярысь.

Семинарез йылпумъяса, журналистъёс Россия Федерациысь йӧскалык журналистикая гильдилэсь Удмуртиын езэтсэ кылдытон сярысь малпанэ вуизы.