Йӧскалык кылъёсты утьыны искусственной визьбур юрттоз. GigaChat (Гигачат) нейросеть сӧзнэт удмурт кыллы дышетскыны кутскоз. Талы сӥзьыса, Удмурт Элькунысь йӧскалык политикая министерство но Сбер ӵош ужан сярысь тупанкыл кутӥзы. Ужкагаз Удмурт кыллэн нуналаз, 27-тӥ шуркынмонэ, кинюртэмен юнматэмын.

Сӧзнэтэз дышетон вылысь, элькун удмурт кылэ берыктэм текстъёсты ужась-лэсьтӥсьёслы сётоз. Отчы пырозы книгаос, статьяос, тодослыко- дышетон печатламъёс, мерлыко вотэсбамъёсысь постъёс но мукет материалъёс. Искусственной визьбурез удмурт кылын «вераськытон» понна, та ӧнерчиос удмурт кылын вераськись адямиосын ужалозы, сӧзнэтэ вачевераськонъёсты но мукет ивортодэтъёсты ватсалозы. Собере люкам текстъёсысь янгышъёсты эскерозы но машина програмае пыртозы.

Дарья Сунцова, Удмурт Элькунлэн Тӧроезлэн Россия Азьмурт бордысь Ялан ужась огмуртэз – Удмурт Элькун Кивалтэтлэн Тӧроезлэн воштӥсез:

«Россия Федерациысь калыкъёслэсь кылъёссэс утён но азинтон – со Кун йӧскалык политика Стратегилэн валтӥсь ужпумез. Удмурт Элькунын йӧскалык кылэз утён понна кутэмын эсэплыко-эрикрадъем актъёсс. Соос пӧлын Кун программа, кудӥз Удмурт Элькун Кивалтэтлэн 20-тӥ оштолэзе 2024-тӥ аре 748-тӥ номеро пуктэтэныз юнматэмын. Бадӟым уж нуиське удмурт кылэз лыдпус амалэ выжытонлы. Текстэн корпусъёсты кылдытон но дасян, кудъёсызъя собере искусственной визьбур сӧзнэтъёсты дышетыны луэ, со туж кулэ луись уж. Та ужрад азьланяз удмурт кылэ берыктон удыслы, удмурт кылын текстъёс кылдытон ужлы юрттоз. Цифровизация вакытэ со – тужгес но кулэ маке».

Максим Ерёменко, вице-президент, Искусственной визьбурез азинтонъя но Сбербанкез дышентонъя департаментлэн директорез:

«Россиысь калыкъёслэсь кылъёссэс утьыны но вӧлмытыны, соосты будӥсь нылпиослы выжыятыны – со туж кулэ уж. Сберлэн та ласянь аслаз ужъемышъёсыз вань ини, соосты ми улосвыл партнёръёсынымы ӵектыны дась. GigaChat (Гигачат) странаысьтымы пӧртэм кылъёсты дышетыны кутскоз. Со Петр 1-лэсь киужъёссэ, вашкала Египетысь манускрипъёсты быгатыса сэрттӥз-пертчиз. Удмурт Элькунэн гожтэм тупанкыл сӧзнэтмылы юрттоз удмурт кылэз ас пушказ пыӵатыны. Та паймымон но синмаськымон кыллэн выль улон вакытэз кутске».

УЭ-ысь йӧскалык политикая министр Эдуард Петров:

«Йӧскалык политикая министерство удмурт кылэз лыдаус амалъёсы выжытон, яке цифровизировать карон пумысен бадӟым уж нуэ. Удмурт кылэз вӧлмытон удысын Удмурт Кивалтэтлэн юрттэменыз Удмуртиын IT-продуктъёс но мобильной ватсэтъёс кылдытэмын. Озьы ик бичамын «Удмурт кыллэн йӧскалык корпусэз» («Национальный корпус удмуртского языка»), кудаз пыртэмын трос текстъёс но ӟуч-удмурт, удмурт-ӟуч кыллюкамъёс. Удмурт Элькунысь Йӧскалык лыдӟетъюрт 2009-тӥ арысен удмурт кылын книгаосты оцифровать каре. Лыдӟетъюртын толэзьлы быдэ 400-500 книгаос, газетъёс но журналъёс электрон амалэн ватсасько. Соосты дунне вылысь котькуд сэрегысен усьтыны луэ. Сберен валче ужан бадӟым луонлык сётоз ужын выль вамыш лэсьтыны»

УЭ-ысь Тӧролэн но Кивалтэтлэн пресс-службазылэн ивортэтэзъя.

Озьыен, удмурт кылмес вӧлмытонъя но утёнъя ужмес азинтӥськом!