29-тӥ инвожое Сюмси ёросын ялан ужась кенешон ортчиз. Ужрадэ пыриськизы УЭ-ысь йӧскалык политикая министр Эдуард Петров, Сюмси ёрослэн Тӧроез Павел Кудрявцев, Калыкъёслэн Эшъяськон юртэзлэн директорез Юлия Шахтина, ёрос Администрациысь огмуртъёс, коммерциен герӟаськымтэ огазеяськонъёслэн кивалтӥсьёссы но ёзчиоссы.

Эдуард Петров УЭ-ысь кун йӧскалык политика удысысь иворъёсын но вуоно ужрадъёсын тодматӥз, соос матысь дыре Удмурт Элькунын но Россиысь регионъёсын ортчозы. Нош Сюмси ёросысь ужъюлтошъёс асьсэлэн ужамзы сярысь мадизы. Со сяна, эскеремын вал Удмуртиысь калыкъёслэсь кылзэс но лулчебертсэс утёнъя но азинтонъя юанъёс.

Министр озьы ик пусйиз, таӵе ПДС амалэн ортчись кенешонлэн пайдалыкез бадӟым шуыса. Огласянь, йӧскалык кусыпъёс удысысь юанъёсты сэрттыны-пертчыны луэ, мукет ласянь, со луонлык сётэ шаермес умойгес тодыны, этнотуристической маршрутъёсы пыриськыны.