26-тӥ пӧсьтолэзе Кивалтэт Юртын Удмурт Элькунысь йӧскалык политикая министр Л.Н. Буранова пресс-конфереция ортчытӥз.

Лариса Николаевна вераз 2016-тӥ арын гужем ортчем калык шулдыръяськонъёс сярысь. Туэ «Семык», «Сабантуй», «Гербер», «Москваын Гербер» праздникъёсы огъя 15000 адями вуылӥз. Котькудзэ сӥё-дано усьтӥз но калыкез ӟечкылаз Удмурт Элькунлэн Тӧроез А.В. Соловьёв. Министр пусйиз Герберез Москваын вуоно арын но ортчытыны малпамын шуыса. 2017-тӥ арын бадӟымгес саклык висъяськоз Удмуртилэсь производствозэ возьматонлы. Татын ик луоз Мускоысь инвестръёсын вераськыны.

Вераськонэз азьланьтыса, Лариса Николаевна дугдӥз эшшо одӥгез кулэлыко ужрад вылэ – «Бадӟым этнографи диктант». Акция ортчоз та арын 30-тӥ куарусёнэ Россия Федерациысь 85 улосъёсын. Ужрадэз ортчытозы Удмурт Элькунысь йӧскалык политикая министерство, «Удмуртиысь калыкъёслэн ассамблеязы» мерлыко огазеяськон Йӧскалык ужпумъёсъя федерал агентстволэн юрттэмез улсын. Диктантын юанъёс кык люкетлы люкемын. Нырысетӥ люкетаз юанъёс огъя Россиысь калыкъёс сярысь, нош кыкетӥ люкетаз – нимысьтыз улосын улӥсь калыкъёс сярысь. Акциез ортчытыны юрттозы дышетон ужъюртъёс, муниципал кылдытэтъёслэн администрациоссы, Калыкъёслэн Эшъяськон юртъёссы. Ужаны кутскемын Диктантлэн сайтэз www.e-diktant.ru. Татысь шедьтыны луоз ужрад сярысь ивортодэт, бӧрысь татын ик котькин эскерыны быгатоз аслэсьтыз тодон-валанзэ.

Озьы ик Лариса Николаевна ивортӥз асьмен элькунамы шуркынмон толэзе ортчоно фестиваль сярысь, кудӥз сӥземын ичи лыдъем выжы калыкъёслэн лулчеберетсылы, сям-йылолъёссылы. Фестивальлэн валтӥсь меретэз – ичи лыдъем выжы калыкъёсты огазеян. Фестиваль улсын радъямын луозы крезьгурлы но чеберлыко литературалы сӥзем ӝытъёс, ужалозы кӧня ке тематической площадкаос, радъямын луоз Яр ёросысь Ворца бесерман гуртэн тодматскон но бесерман лулчеберетлы сӥзем фото адӟытон. «Таӵе фестивалез асьмен элькунамы ортчытон сярысь малпан огшоры кылдэмын ӧвӧл. Угось Удмуртиын ичи лыдъем бесерман калык луэ», – валэктӥз Лариса Буранова.