«Көрбан» – УЭ-ысь ичи коренной бесерман калыклэн вашкала сям-йылолэз. «Көрбан» гужем ортчылӥз бусы ужъёс йылпумъяськем бере.

Таяз аре шулдыръяськон (0+) 14-тӥ инвожое Балезино ёросысь Юнда черкогурт котырын ортчоз. 2025-тӥ арын «Көрбан» («Корбан») бесерман йӧскалык шулдыръяськонлэн валтӥсь тодметэз сандык луоз – йӧскалык сям-йылолъёссылэн семья синпелетсылэн утисез.

Сандык бесерман калыклэн сыӵе ик аспӧртэм паймымон арбериез, кызьы бесерман крезь гур, кыл но сиён-юон. Котькуд семьяын шыкысъёс пото ныл вордӥськемен. Ку ныллы тямыс-укмыс арес тырме, солы пирдан дасяны кутско вылэм. Котькуд сандыклэн аслаз тунгонэз, нош усьтонэз – нылкышно кузё киын гинэ луыны быгатэ.

Туннэ но улосчиос шыкысъёссэс утьыса возё, бесерман калыклэсь ӵыжы-выжыоссэ, лулчеберетсэ но сям-йылолъёссэ тодэ возьыса.

«Көрбан» шулдыръяськонын бесерман калыклэн сандыкъёсыныз адӟытон дасямын луоз. Ужрадын пӧртэм азбаръёс радъяськозы: «Бесерманка» мунё лэсьтонъя, синпелет сандыкез чеберманъя, горд сӥньыслэсь суйпоскес лэсьтонъя мастер-классъёс, озьы ик «Песянай сандыкысь» («Из бабушкиного сундучка») адӟытон но трос мукет тунсыко вожвылъяськонъёс.

Ужрадэ пыриськыны ӧтисько элькунысь, бускель ёросъёсысь делегациос, бесерман мерлыко огазеяськонъёсысь вань улосчиос но куноос. Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

«Көрбан» шулдыръяськонлэн радъясьёсыз – УЭ-ысь йӧскалык политикая министерство, Калыкъёслэн Эшъяськон юртсы, УЭ-ысь бесерман калыклэн огазеяськонэз, «Атай» бесерман лулчеберетъя, история, туризмъя фонд, Балезино ёрослэн администрациез.