27-тӥ тулыспалэ Пичи Пургаын «Анай кыл – улон инъет» нимо форум ортчиз.

Люкаськем калык азьын ёрослэн кивалтӥсез Александр Ерохин но вераськиз. Со пусйиз калыклэсь лулчеберетсэ, сям-йылолъёссэ утёнын анай кыллэсь бадӟым инты басьтэмзэ. Соин ик та уж борды рос-прос басьтӥськоно, тужгес но удмуртъёслы, угось кылмы ышисьёсыз кылъёс пӧлы пыртэмын.

Докладъёс лыдӟем бере, дышетӥсьёс, муниципал кылдытэтъёслэн кивалтӥсьёссы, Удмурт Элькунысь йӧскалык политикая министерствоысь ӧнерчиос котырес ӝӧк сьӧрын удмурт кылэз азинтон сярысь вераськизы. Нимысьтыз саклык висъямын вал школаосын но нылпи садъёсын кылъёсты дышетон удысын пумиськись шуг-секытъёсты шараянлы, сэртто-пертчонлы.

Ёрос лыдӟетъюртлэн шаертодон ёзэтаз ужасьёс тодматӥзы асьсэлэн ӵектосэнызы, кудӥз нимаське «Межнациональный контакт». Та ӵектос лэсьтэмын палэнысь лыктэм адямиослы (мигрантъёслы) но ёросын улӥсь вань калыкъёслы шаермы но калыкъёсмы сярысь тодон-валанзэс паськытатон, муромытон вылысь. Проект радын малпамын ортчытъяны пӧртэм пумо ужрадъёс, кудъёсыз пыр адямиос огзэс огзы ӟечгес тодозы, валаны дышозы. Со сяна та ӵектос улсын ик калыклы юридической но психологической юрттэт сётэмын луоз.

Туспуктэм: https://malayapurga.ru/