Литературалы сӥзем арын Сарапулын пусйымон ужрад ортчиз. 29-тӥ шуркынмонэ лыдӟетъюртъёслэн огъям сӧзнэтсылэн филиалаз, «Солнечная» лыдӟетъюртын, Йӧскалык литературая ванёс центр усьтӥськиз. Та центр Удмуртиын нырысетӥез луэ.

Ужрадэ пыриськизы карен кивалтӥсьлэн мерлык удысэн герӟаськем юанъёсъя воштӥсез В.М. Шестаков, Лулчеберетъя но егитъёсын ужан политика кивалтоннилэн кивалтӥсез И.В. Манылов, Сарапулысь мерлыко огазеяськонъёслэн кивалтӥсьёссы.

Калык дӥсен кышномуртъёс пумитаз куноосты, тодматӥзы Центрен, варазы солэн луонлыкъёсыз, ужан ӧръёсыз, аспӧртэмлыкез сярысь. Центрлэн валтӥсь меретэз – Сарапулын улӥсь пӧртэм калыкъёслэсь лулчеберетсэс но кылзэс утьыны юрттон. Центрын люкамын луозы печатлам но электон кабен калыкъёс сярысь ивортодэт, луонлык усьтӥськоз йӧскалык лулчеберетъя электрон каталоген но базаосын ужаны.

Игорь Владимирович Манылов пусйиз таӵе центрлэсь кулэлыксэ, тау кариз лыдӟетъюрт сӧзнэтысь ужасьёслы усто ӵектоссы понна. Ӵектос вормиз Удмурт Элькунысь йӧскалык политикая министерствоен субсиди сётон вылысь ялэм конкурсын.

Ӵектосэз быдэстон выль луонлыкъёс усьтэ пӧртэм калыкъёслы ог-огенызы литература пыр кусыпъёс радъяны, лулпушсэс узырмытыны. Лыдӟетъюрт книга кадь ик калыкъёсты огазея, анай кылэз уте но сое лыдӟисьёс доры вуттэ.

Лилия Юрьевна Быкова, Лыдӟетъюртъёслэн огъям сӧзнэтсылэн кивалтӥсез, выль «В национальном хороводе слов» ӵектос сярысь мадиз. Адямилэн улонысьтыз 10 валтӥсь кылъёс, кылсярысь, «вордӥськем шаер», «тупаса улон», «анай», «эшъяськон» Сарапулын улӥсь калыкъёслэн кылъёсазы чузъяськозы. Соосты тодоз но валалоз котькуд улосчи.

Вераны кулэ на, центрез усьтон ужрад улсын «Подари библиотеке национальную книгу» акци радъяськиз.

Центырлы но ужасьёслы азинлык сӥзизы мерлыко огазеяськонъёслэн кивалтӥсьёссы: : Мустафаев Роман Ахметович, Исламгалимов Фаил Фасхутдинович, Трофимова Раиса Фадеевна но мукетъёс. Котькудӥз соос пӧлысь анай кылын гожтэм книга но компакт-диск кузьмаз. «Туж кулэлыко ужлы кутскон сётэмын, – пусйиз Роман Мустафаев, – Йӧскалык литератуя ванёс центр Удмуртиысь калыкъёслэн эшъяськыса улонзылы бадӟым юрттэт».

Галина Раифовна Ахтамянова, ивортодэтъя но методикая карысь центрлэн кивалтӥсез, лыдӟетъюртэн азьланяз но пайдалыко ужанлы осконзэ вераз. Пусйиз центрлэсь семьяен лыдӟиськон сямез улӟытонын бадӟым интызэ. Галина Раифовна «Вятское краеведение, XIX век» но бигер кылын «Педагогика» книгаос кузьмаз.

Озьыен, Ванёсъёсъя карысь выль центр, кудӥзлы «Содружество» (эшъяськон) ним понӥзы, калыкъёслы ӧсъёссэ усьтӥз но ас дораз куное вите.