«Язык предков» анай кылъёсты утёнъя фонд Калыккуспо кыллэн нуналэзлы сӥзем «Язык предков» VII Улоскуспо вожвылъяськонэ нылпиосты но егитъёсты пыриськыны ӧте.

Вожвылъяськонлэн азьмугез: анай кылын вераськись таланто нылпиослы юрттэт сётон, йӧскалык кылъёсты вӧлмытон. Озьы ик вожвылъяськон Россиысь калыкъёслэсь кылъя лулчеберетсэс юнматон но азинтон, йӧскалык кылъёслэсь инлыксэс, ним-данзэс ӝутон понна ортчытӥське.

Пыриськыны быгато нылпиос но егитъёс 3 аресысен 22 аресозь: нылпи садъёсысь, школаосысь пиналъёс, устолыкъя дэменлыкъёс, студиос но мукет.

Номинациос:

• Анай кылын гожтосэз веран (кылбуръёс яке проза)
• Калык устолыкъя литература но крезьгур сузьет (выжыкылъёс, былинаос, мадькылъёс, балладаос)
• Кырӟан устолык (анай кылын кырӟанъёс)
• Инструментальной устолык (калык инструментъёсын шудон)
• Йӧскалык мода
• Ролик

Пыриськисьёслэн куремъёссыя ватсам номинациос:

• Калык киужъёсъя устолык
• Изобразительной устолык (пӧртэм амалэн лэсьтэм суредъёс)

Вожвылъяськон Калыккуспо кыллэн нуналэзлы сӥземын бере, ужъёслэн тематиказы мед возьматоз ас Вордскем шаердэ, анай кылдэ но калык сям-йылолъёсты яратонэз.

Вожвылъяськонлэн радъясез – «Язык предков» анай кылъёсты утёнъя фонд. Оглом вань аръёс ӵоже та ужрадэ странаысьтымы 3 000-лэсь трос нылпиос пыриськизы ини. Со эшшо огпол валэктэ асьмелы, кыл – калыклэн лулчеберет узырлыкез.

Вожвылъяськонлэн Положениеныз татын тодматскыны луэ.