29-тӥ коньывуонэ Калыкъёслэн Эшъяськон юртазы билингвизмъя-кыккылолыкъя семинар ортчиз. Отчы пыриськизы Ижкарын улӥсь удмурт анай-атайёс нылпиосынызы.

Кыккылолыкъя «Билингва» удмурт центрлэн семинарез кутскиз шара лыдӟонысен. Билингвизмез эскерись тодосчи Лариса Широбокова-Монако сое нылпиосын но анай-атайёсын ӵош нуэ.

«Таӵе ужрадын пиналъёс валаны кулэ – книга со улэп, соин вераськыны луэ – шуэ тодосчи. – Таӵе шара лыдӟиськонъёсын быгатӥськом удмурт кылын поттэм книгаосмес, берыктэм ужъёсмес пиналъёс но анай-атайёс пӧлын вӧлмытыны. Туннэ котькуд нылпи валаны кулэ, удмурт кыл – со улэп кыл, со чузъяське шуыса. Со тужгес но кулэез удмурт кылмес влмытонын».

«Билингва» центрлэн 2 ар ужатозяз, таӵе семинарез 4-тӥез луэ. Туннэ ӧнерчиос огкылысь пусъё, валтӥсь инты, кытын улэ кыл – со семья.

Семинарын анай-атайёс но нылпиос понна радъямын вал нимаз площадкаос. Анай-атайёсын ужалозы кыккылолыкъя ӧнерчиос, логопед но нылпи психолог. Нылпиос понна радъямын вал «Шудон корка» площадка.

Вера кыккылолыкъя «Билингва» удмурт центрысь ӧнерчи Татьяна Волкова: «Ми тросгес саклык висъяськомы семьяен ужанлы. Вуоно арысен малпаськомы эскерон уж ортчытыны. Кутом кӧня ке семьяосты но эскером, кыӵе луонлыкъёс кылдытоно, семья пушкын кыл мед азинскоз шуыса».

Туннэ семья пушкын кыллэн азинскемез тыро-пыдо эскеремын ӧвӧл. Вань логопедъёслэн, психологъёслэн, кыкккылолыкъя ӧнерчиослэн статьяоссы. Нош нимысьтыз семья ужпумъёс палэнэ кылемын.Со сярысь вераськон мынӥз семинарлэн мукет люкетаз – мумы-бубыосын пумиськонын.

Ижкарын выльысь ужаны кутскиз пиналъёслы «Шудон корка» ӵектос. Куке но сое кылдытӥзы вал Настя но Миклош Дэметеръёс. Но пӧртэм мугъёсъя со ужамысь дугдӥз. «Али йӧскалык политикая Министерство юрттэмен, проект нош ик карын улӥсь удмурт пиналъёсты огазея, – шуэ «Шудон корка» ужӵектосэз азьланьтись Надежда Степанова. – Жаляса верано, пиналъёс нылпи садэ мыныса ӟучомо. Ӧвӧл кылдытэмын этноязыковой среда. Нош татын соос адӟо сыӵе ик пиналъёс удмурт кылын верасько и шудыкузы соос куспазы анай кылын верасько, нош со тужгес дуноез».

Ивортодэт но туспуктэм кутэмын: Калыкъёслэн Эшъяськон юртсы