Нимысьтыз ожгар операцие пыриськисьёслы юрттэтъя фондъёслэн огмуртъёссы кун ёзэт тӧрлыкъёсын ӵош Ижкарысь дышетскисьёслы граждан юнлыкез ӝутонъя урокъёс ортчытӥзы.

Удмурт Элькунысь «Долг» нимо мерлыко егит огазеяськонлэн кивалтӥсез но Ижкарысь Е.Ф. Драгунов нимо индустриальной техникумын история урокъёсты нуись Фаиль Ибрагимов тодматӥз дышетскисьёсты «Долг» нимо огазеяськонлэн ужаменыз. Со ивортэк бырем солдатъёсты утчанлы но архивысь ужкагазъёсты идентифицировать каронлы сӥземын.

Ожысь ветеран Валерий Алехин Афган ож сярысь мадиз. Семен Малофеев, ожысь ветеран, кунпуш министерстволэн полковникез, «Афганистанысь но нимысьтыз ожгар операциосысь Россилэн ожгар ветеранъёссылэн герӟетсы» нимо Удмурт Элькунысь Россиякуспо огазеяськонлэн ёзэтэзлэн тӧроез, Чечняын ортчем ожмаськон сярысь вераз. Кунпуш службалэн отставкаысь полковникез, ожысь ветеран Александр Новгородцев но полицилэн отставкаысь полковникез, Удмурт Элькунысь катэз чаклась ёзэтъёсъя сӥё-дано ужась Владимир Ефремов поколениослэн герӟетъёссы но «РОСЫ» нимо ожгар-патриотической огинлыклэн ужез сярысь веразы-мадизы.

Ужрадын Удмурт Элькунысь йӧскалык политикая министерство но нимысьтыз ожгар операцие пыриськисьёслы юрттэтъя фондэзлэн «Защитники Отечества» нимо филиалэз валче ужан сярысь огкыл гожтӥзы. Озьы ик патриотической но этнокультурной ужрадъёсты ортчытъян пумысен но огазеяськонъёслэн ӵектосъёссылы ивортодэтъя юрттэт сётон пумысен тупанкыл гожтӥзы фондлэн «Защитники Отечества» нимо филиалэз но Калыкъёслэн Эшъяськон юртсы. Огкыл улэ гожтӥськизы Удмурт Элькунысь нимысьтыз ожгар операцие пыриськисьёслы юрттэтъя «Защитники Отечества» нимо филиаллэн кивалтӥсез Максим Шумихин, Удмурт Элькунысь йӧскалык политикая министр Эдуард Петров но Калыкъёслэн Эшъяськон юртсылэн тӧроез Юлия Шахтина.

Максим Шумихин пусйиз: «Мынам куронэ вань – туж сак учкелэ адямиос шоры, кинлэн матысь адямиоссы али отын. Соослы али туж секыт. Котькуд адями сярысь сюлмаськелэ. Куке ми ӵош, ми кужмогес. Со понна ик азьмуртлэн кичӧлтэмезъя фонд кылдӥз. «Защитники Отечества» нимо фонд юрттэ котькуд адямилы, кудӥз сыӵе шуге-леке вуэ. Саклыкенымы, сюлмаськонэнымы ми одно ик котькудӥзлы юрттом. Ужкагаз гожтыса яке огшоры кенешыса. Фонд одно ик юрттэт сётоз, куке лыдэ басьтӥськыны кулэ медицинской но мерлыко йӧназъян, эмъюм тырмыт сётон, психологической юрттэт».

Геройёслэн нуналазы вуылӥзы нимысьтыз ожгар операцие пыриськисьёс но: Игорь Шиляев, Руслан Решетников, Марс Салаватуллин но Андрей Панько. «Ми – асмылкыдчиос, кылем арысен, – вераз Андрей Панько. – Быдэс странаысьтымы адямиос та секыт ужез лэсьто, угось со уж – туж кулэ луись маке».

Ужрадын «Солдатлы гожтэт» нимо акция ортчытэмын вал, отын нылпиос нимысьтыз ожгар операцие пыриськисьёслы тау карон гожтэтъёс гожтӥзы. Азьлогес та акцие асьме элькунысь мукет каръёс но ёросъёс пыриськизы. Калыкъёслэн Эшъяськон юртсылэн сцена вылаз со кагазъёсты Удмурт Элькунлэн Кун Советысьтыз Виктор Дьяков депутатлэн юрттӥсезлы София Казначеевалы сётӥзы, ваньзэ со гожтэтъёсты тылож мынӥсь интые келян понна.