16-31-тӥ толшоре укмысэтӥ ползэ Холостын быремъёсты буре вайыса Калыкуспо нуналлы но Горд Армилэн «Аушвиц» (Освенцим) лагерез мозмытонлэсь бадӟым лыдзэ пусъёнлы сӥзем Арня радъяськоз.

Та Арнялэн сӥё-дано усьтонэз толон ортчиз ни, но со сяна, быдэс арнялы мукет пӧртэм мемориальной но югдытӥсь ужрадъёс малпамын.

Вань пыриськисьёслы ӟечкылан кылъёсын вазиськись УЭ-ысь йӧскалык политикая министр Эдуард Петров. Солэн верамезъя, таӵе ужрадъёс туж кулэ.

«77 ар талэсь азьлогес ортчиз быдэс дуннеысь тужгес но кышкыт война. Ноку уз вунэ нацистъёслэн шимес йыружъёссы, кудъёсыз войнаез кутскизы. Холокост сярысь асьмелы ноку но вунэтоно ӧвӧл, таӵе учыръёс медаз луэ ни шуыса», – пусъе Эдуард Степанович.

Ужрадлэн куноосызлы «Игрушки войны» нимо спекталь возьматӥзы. Солэсь инъетсэ кылдыто Анна Франклэн дневникысьтыз гожтэмъёс, озьы ик шимес учыре шедем еврей нылпиослэн гожтэтъёссы но тодэ ваёнъёссы.

25–27-тӥ толшоре Калыкъёслэн эшъяськон юртазы «Игрушки войны» та спектаклез возматозы на «Халом» нимо Воскресенской еврей школаысь дышетскисьёс.