Калыкъёслэн эшъяськон юртазы инклюзивной бал ортчиз. Та ужрад улсын «Тӧдьы сяська» («Белый цветок») акцилы йылпумъянъёс лэсьтӥзы – секыт висёнэн висись куать нылпиослы юрттон понна коньдон люкамын вал.

21-тӥ шуркынмонысен 18-тӥ толсурозь элькунын ньылетӥ ползэ «Белый цветок» ӟечлэсьтон акция ортчиз. Калыкъёслэн эшъяськон юртазы та ужрадэз но инклюзивной балэз радъязы Инвалидъёслэн россиякуспо огазеяськонзы но «Бродвей-инклюзив» эктонъя студия.

Ужрадэ сӥё-дано куноос вуизы. Соос пӧлын: УЭ-ысь мер политикая министр Ольга Лубнина, УЭ-ысь лулчеберетъя министр Владимир Соловьев, Ижевской но Удмуртской митрополит Викторин, Ижкар Администрациысь мер политикая тӧролэн воштӥсез Дмитрий Чистяков, Инвалидъёсъя Россиякуспо огазеяськонлэн предедателез Максим Воробьёв но «Белый цветок» ассоциацилэн валтӥсь директорез Михаил Косачев.

Акция ортчытэмен, секыт висёнэн висись куать нылпиослы юрттон понна коньдон люканы удалтӥз. Нылпиос йӧнатӥсько «Аделия» ичиятэм луонлыкъёсын нылпиосты но быдэ вуымтэосты йӧназъянъя элькун центрын.

Митрополит Викторин «Аделия» центрлэн кивалтӥсезлы Людмила Чесноковалы 330 сюрс манетэн сертификат сётӥз.
Озьы ик «Что такое милосердие» нимо эссеосъя вожвылъяськонлэн йылпумъянъёсыз лэсьтэмын вал, та ужрад «Белый цветок» акциен валче радъяськиз.

(Ижкар епархиысь пресс-службалэн ивортэмезъя)