28-тӥ тулыспалэ Калыкъёслэн Эшъяськон юртазы Удмурт кун университетын, М.Т. Калышников нимо Ижкарысь техникая кун университетын но Ижкарысь эмтодос академиын дышетскись кунсьӧр студентъёсын пумиськон ортчиз.

Нырысь ик студентъёс тодматскизы Калыкъёслэн Эшъяськон юртэнызы. Йӧскалык кусыпъёсъя ёзэтлэн кивалтӥсез, Удмурт Элькунысь егитъёслэн мерлыко огазеяськонъёссылэн «Вместе» ассоциацизылэн координаторез Мария Царёва вераз ужъюртлэн ужез сярысь, та липет улын ужась мерлыко огазеяськонъёс сярысь.

Бӧрысь студентъёс нимысьтыз тодматскизы «Вместе» ассоциацилэн уженыз. Та ассоциация огазея ӟучъёсты, бигеръёсты, удмуртъёсты, армянъёсты, азербайджанъёсты, еврейёсты, немецъёсты, поръёсты но корейъёсты. Огазеяськонлэн ёзчиосыз эшъяськон урокъёс, пӧртэм акциос, форумъёс, семинаръёс, лагерьёс, тренингъёс ортчытъяло. Тужгес но тодмо но калыке вӧлмем ужрадъёс пӧлы пыртыны луэ егитъёслы йӧскалыккуспо лагерь сменаосты, «Триколор единства» акциез, «ЭТНОэксперт» визьбур шудонэз, «Егитъёслы йӧскалыккуспо дышетон центр (Многонациональный молодежный образовательный центр)» мерлыко огазеяськонъёслэн ёзчиоссылы кенешон площадкаез.

«Ми тӥледыз мерлыко ужрадъёс но ӵектосъёс бордын ӵошен ужаны ӧтиськомы», – веранзэ йылпумъяз Мария Царёва.

«Шунды» мерлыко огазеяськонлэн кивалтэтэзлэн ёзчиез Максим Агафонов огазеяськонэн тодматӥз, ӵектосъёсыз сярысь вераз.

«Калыкъёслэн Эшъяськон юртазы вуылон сяме пыӵаз ини. Туннэ та пумиськонын УдГУ-ын дышетскись Финляндиысь, Туркмениысь, Сербиысь, Иракысь, Йеменысь, Таджикистанысь, Сальвадорысь, Колумбиысь студентъёс, – пусйиз Татьяна Савченко, УдГУысь йӧскалыккуспо дышетон центрлэн кивалтӥсез. – Таӵе пумиськонъёс мерлыко огазеяськонъёслэн уженызы тодматыны, вачеужан ӧрез бырйыны юртто».

Йылпумъяськиз пумиськон финн-угор калыкъёслэн, ӟучъёслэн, еврейёслэн но Удмуртиын улӥсь мукет калыкъёслэн эктонъёсынызы тодматсконэн.