23-тӥ оштолэзе 2017-тӥ арын Калыкъёслэн Эшъяськон юртазы Кыккылолыкъя VIII семинар радъямын вал.

Семинарлэн нылпиослы чаклам люкетэз шутэтскон нуналэ радъям школа форматэн ортчиз. 1,5 аресыен 4 аресозь но 5 аресысен нылпиос нимаз группаосы люкемын вал. Соос понна удмурт кылын математика, киужен вырон но кылэз волятон урокъёс чакламын вал. Дышетскон вискын нылпиос шудӥзы. Анай-атайёс мылкыд каремзыя кыккылолыкъя ӧнерчиен но нылпи психологен кенешыны быгатӥзы.

Семинарын ик экспериментэз радъян сярысь вераськон мынӥз. Экспериментально-исследовательской ужлэн целез – семья пушкысь удмурт кылын вераськонэз эскерон.Экспериментлэн научной кивалтӥсез Ирина Борисовна Ворожцова, педагогика тодосъёсъя доктор, филологи тодосъёсъя кандидат, профессор, кыккылолыкъя ӧнерчи, луэ.

Семинарез радъясьёс:

«Билингва» кыккылолыкъя удмурт центр

Анай кыллы дышетӥсьёслэн «Выжы» Ассоциацизы

«Калыкъёслэн Эшъяськон юртсы» Удмурт Элькунысь коньдэтэн возиськись ужъюрт

Удмурт Элькунысь йӧскалык политикая министерстволэн юрттэмезъя.