Адӟытон ньыль люкетлэсь кылдытэмын, со тодматэ казакъёслэн сям-йылолъёсынызы. Удмурт Элькунысь казак огазеяськонъёс ас экспозициоссэс дасязы. Татысь быгатоды адӟыны пӧртэм вакытъёсысь казакъёслэсь дӥсьсэс, пыӵал-тӥрлыксэс но мукет арбериосты.

Адӟытонэз 22-тӥ куарусёнэ сӥё-дано усьтӥз «Колос» калык кырӟанъя ансамбль.

Ӟечкылан кылъёс веразы Удмуртиысь нимысьтыз окружной Верхнекамской казак огазеяськонлэн атаманэз Григорий Гусаров, Михаил Коников-Зорин нимо станичной Царёво-Константиновской казак огазеяськонлэн атаманэз, Удмурт Элькунъя Россиысь но кунсьӧрысь казак ожгарчиослэн Союззылэн ожкалык старшинаез, Ижкарысь ветеранъёслэн кенешсылэн военно-патриотической уж нуонъя кивалтӥсезлэн воштӥсез Алексей Зорин, Удмурт Элькунъя Россиысь но кунсьӧрысь Казак ожгарчиослэн Союззылэн ожкалык атаманэз Владимир Пантюхин, Удмурт Элькунысь казак Союзысь кубанской казакъёслэн улосчи огазеяськонзылэн атаманэз Александр Гусев, Удмурт Элькунлэн йӧскалык политикая мониторингъя но йӧскалык кусыпъёсты эскеронъя ёзэтлэн кивалтӥсез Лариса Нигматзянова.

Григорий Гусаров: «Адӟытонын ми тыршимы возьматыны казак службалэсь кун понна трос удыслыко луэмзэ. Тросэз тодэ ук, казакъёс кунлы служить каро шуыса. Казакъёслэн лэчыткылзы вань – кыӵе эксэй дорын улӥськом, солы ик служба нуиськом. Эксэй вакытэ самодержавилы служба нуим, Совето вакыт дыръя – совето калыклы, туала Россия Федерациын – Россимес умоятон вылысь кун служба нуиськом».

Адӟытонэз усьтэм бере Григорий Гусаров экскурсия ортчытӥз но Россиысь казакъёслэн историенызы но сям-йылолъёсынызы тодматӥз.

Озьы ик ужрадлэн усьтӥськоназ пыриськизы Ижкар епархиысь казак вачекусыпъяськонъя ёзэтлэн кивалтӥсез Владимир Страшнов, Ижкарысь ветеранъёслэн кенешсылэн кивалтӥсез Валерий Красноперов, 67-тӥ номеро профильной классъёсысь пиналъёс, кадет классъёс, Удмурт кун университетысь кылъя но межкультурной кусып возёнъя кафедраысь дышетскисьёс.

Россиысь казачество мерлык понна котькуд вакытэ туж бадӟым уж нуиз. Туала казак огазеяськонъёс улонмылэн пӧртэм удысъёсаз мыло-кыдо ужало. Соос пырисько патриотизм мылкыдо но лулчеберетъя ужрадъёсы, мерлык огазеяськонъёслы но ӟечлэсьтон акциослы юрттэт сёто, граждан люконтэм луонлы, йӧскалык кусыпъёсты умоятонлы, экстремизмлэсь утиськонлы бадӟым саклык висъяло.

Туала будӥсь пиналъёсмес дышето патриотизмо, граждан мылкыдо луыны, Россиысь казакъёслэсь котьку адӟем карыны. Казак огазеяськонъёс пыр-поч ужало асьсэ лулчеберетсэс, сям-йылолъёссэс утён но азинтон понна, таос уго йӧс асвалан но йӧскалыккуспо ӵош ужанлэн кулэ луись люкетсы луо. Казакъёс – Россиез утисьёс, мерлык но лулчеберет улонэ мыло-кыдо пыриськисьёс.

Адӟытон ортче Калыкъёслэн эшъяськон юртсылэн 2-тӥ этажысь холлаз 22-тӥ куарусёнысен 11-тӥ коньывуонозь. Пыронэз дунтэк.