2-тӥ южтолэзе 2014-тӥ аре украин лулчеберетъя «Громада» огазеяськон Удмурт Элькунысь йӧскалык политикая министерстволэн но Калыкъёслэн Эшъяськон юртсылэн юрттэменыз ортчытӥз Тарас Шевченколэсь произведениоссэ вольыт лыдӟонъя вожвылъяськон. Та арын ужрад кылбурчилэн котырес лыдпусэзлы, вордӥськем дырысеныз 200 ар тырмонэзлы, сӥземын вал.

Ужрад Калыкъёслэн Эшъяськон юртазы ортчиз. Трос калык люкаськиз кылзыны дано кылбурчилэсь, писательлэсь ужъёссэ. Пумиськонэз кутскиз «Громада» огазеяськонлэн кивалтӥсез С.М. Хаба. Озьы ик сцена вылэ ӧтемын вал куноос. Трос кылъёс верамын вал Т.Шевченколэн ужъёсыз сярысь, солэн быдэс дунне лулчеберетын интыез сярысь. Пиналъёслэсь лыдӟемзэс дунъян понна быръемын вал нимысьтыз жюри. Татчы пыризы министерствоысь, Калыкъёслэн эшъяськон юртысьтызы, нылпиослы ватсаса валатон сётӥсь дышетон ужъюртъёсысь ӧнерчиос.

Вожвылъяськонэ 31 дышетонъя ужъюртъёсысь 65 адями пыриськиз. Ижкарысь сяна Воткакарысь, Дэриысь, Балезиноысь но пиналъёс вуизы. Лыдӟемын вал ог 30 произведение ӟуч, украин но удмурт кылъёсын.

Вожвылъяськонэ пыриськем пиналъёсты пусйизы данъянъёсын но кузьымъёсын, нылпиосты дасясь дышетӥсьёсты – таукарон гожтэтъёсын.

Жюрилы тужгес ярам пиналъёсты азьланьын адӟыны но кылыны луоз на «Громада» огазеяськонлэн мукет ужрадъёсаз. Угось Т.Шевченколы сӥзьыса ортчозы на концертъёс, адӟытонъёс, литература ӝытъёс.