15 ар ӵоже Калыкъёслэн Эшъяськон юртэзлэн ужез герӟаськемын пӧртэм калыкъёслэсь лулчеберет кылёссэс (наследизэс) утёнэн, азинтонэн но калыкъёс пӧлын ӟеч, чидан мылкыдэз пыӵатонэн.

Котырес лыдпусэз пусйыса, юртысь ужасьёс 15 нунал кыстӥськись «Марафон Дружбы» нимо ужрад ортчытыны малпазы. Отын котькуд нунал сӥземын сыӵе удысъёслы, кудъёсыз бордын ужа ужъюрт.

Туннэ марафонлэн сӥё-дано усьтонэз ортчиз но нырысетӥ нуналэз кутскиз. Со тодон-валан нуналлы сӥземын вал, кытчы мылысь-кыдысь арнянунал (воскресной) но этнокультурной школаосысь пиналъёс пыриськизы.

Йӧскалык политикая министрлэн воштӥсез Александр Филатов но Калыкъёслэн Эшъяськон юртэзлэн директорез Юлия Германовна Шахтина арнянунал но этнокультурной школаосысь кивалтӥсьёсты тау каронъёсын данъетазы.

Удмурт Элькунысь Кун Кенешлэн Тӧроезлэн воштӥсез Татьяна Ишматова анай-атайёслы но дышетӥсьёслы тау кылъёс вераз но пусйиз, али дыре анай кылэз азинтыны но пӧртэм калыкъёсын эшъяськыны луонлыкъёс бадӟымесь луо шуыса.

«Движение Первых» улосвыл ёзэт Кенешлэн Тӧроез Ольга Бускина Калыкъёслэн Эшъяськон юртын движенилэн кутскемез-усьтӥськем сярысь Юлия Шахтиналы свидетельство сётӥз. «Движение Первых» – пиналъёслэн но егитъёслэн Россиякуспо мерлыко-кун движенизы.

Та вакытэ ДДН «Родина — значит вместе!» ӵектос бордын ужа ни, кудӥз «Движение Первых»-лэсь грантсэ утӥз.

Сӥё-дано усьтӥськон бере площадкаосын мастер-классъёс ортчизы: Ижкарысь атомной дыкужымъя (энергияя) ивортодэто центр пыр-поч вераз, марлэсь атомъёс кылдо; азинсконъя но ужудысъёсын тодматсконъя «Вектор» нылпи центр ӝӧквыл но мукет шудонъёс ортчытӥз. Эшшо огаз туркымын (группаын) пыриськисьёс вашкала сарапул рецептъёсъя пряникъёс лэсьтыны дышетскизы, пӧртэм профессиосын тодмасткизы.

Азьланяз марафонын – эшшо 14 нунал. Ужрад сярысь пыр-почгес Калыкъёслэн Эшъяськон юртэзлэн вотэсбамаз тодыны луоз.