9-тӥ оштолэзе Калыкъёслэн эшъяськон юртазы Песах еврей праздник ортчиз. Со одӥгез сӥё-дано ужрад, кудӥз еврей калыклэн египет рабстволэсь мозмытсконэныз герӟаськемын.

Лыктэм куноосты шулдыртӥзы пӧртэм коллективъёс, кырӟасьёс но эктӥсьёс. Чузъяськиз иврит кылын кырӟан, «Скрипач на крыше» мюзикл, «Шалом алейхем», «Атиква» Израиль шаерлэн гимнэз, «Набукко» операысь ог люкетэз.

Еврей лулчеберетысь тужгес но кулэлыко «Eli Eli» но «В следующем году в Иерусалиме» кырӟанъёс, кудъёссэ Ксения Ситдикова но Илья Фролов кырӟазы.

Озьы ик ужрадын «Эрудаика» еврей тодон-валанъёсъя Олимпиадаын II инты басьтэм пиналъёсты сӥё-дано пусйизы.

Калыкъёслэн Эшъяськон юртсылэн ивортодэтэзъя