26-тӥ тулыспалэ Кез ёросын ортчиз Удмурт Элькунысь йӧскалык политикая министерстволэн нуналэз. Министрлэсь ужзэ быдэсъясен Л.Н. Бурановаен ӵош та ужрадэ пыриськизы министерствоысь, Калыкъёслэн эшъяськон юртысьтызы ӧнерчиос, мерлыко огазеяськонъёслэн ёзчиоссы.

Пумиськонэ ӧтемын вал Кез ёросысь гурт улосъёслэн кивалтӥсьёссы, ёрос Администрацилэн ёзэтъёсысьтыз ӧнерчиос, миграци службалэн ӧнерчиосыз, мерлыко огазеяськонъёслэн ёзчиоссы, дышетон но лулчеберет ужъюртъёслэн кивалтӥсьёссы, ивор вӧлмытӥсь валтосъёс, блогеръёс. Огъя ог 100 адями люкаськиз.

Люкаськонлэн валтӥсь ужпумез – йӧскалык политикаез быдэстон удысын Министерстволэсь но «Кез ёрос» муниципал кылдытэлэсь ӵош ужан сюрессэс эскерон, угось та удысысь берло воштӥськонъёсты лыдэ басьтыса, йӧскалык кусыпъёсты радъян понна кыл кутоно луо муниципал кылдытэтъёс.

Кез ёрослэн Тӧроез Петр Евгеньевич Князев аслаз вазиськоназ пусйиз: «Ёросамы ог-огенызы артэ уло ӟучъёс, удмуртъёс, бигеръёс, ог 20 ар татын уло ини армянъёс, чеченъёс, азербайджанъёс. Кылдо суро семьяос. Соин ик валтӥсь ужпум – калыкъёс кыспын тупаса улонэз утён».

Пуктэм юанъёсты эскеризы 3 секциосын: 1) «Кез ёрос» муниципал кылдытэтын «Россия Федерацилэн 2025-тӥ арозь кутэм кун йӧскалык политикая Стратегизэ» быдэстон. Секциез нуиз министрлэсь ужзэ быдэсъясь Л.Н.Буранова;

2) «Мерлыко проектъёс бордын ужан: калык кусыпъёсты радъянлы сӥзем ужрадъёсты ортчытъян. Калыкъёслэн эшъяськон юртсылэн «Кез ёрос» муниципал кылдытэтэн ужан амалъёссы. Секциез нуизы министрлэн воштӥсез О.В. Царегородцева но Калыкъёслэн эшъяськон юртсылэн директорезлэн воштӥсез Т.П. Федорова.

3) «Ивортодэт вӧлметын кун йӧскалык политикаез быдэстон сярысь веран». Секциез нуиз министрествоысь ӧнерчи Л. В. Мушегова.

УЭ-ысь йӧскалык политикая министрлэсь ужзэ быдэсъясь Лариса Николаевна Буранова таӵе пумиськонъёслэсь кулэлыксэс но мугъёссэc тодмостӥзэ: «Удмурт Элькунамы трос аръёс ӵоже пӧртэм кылыкъёс куспазы тупаса уло. Али котьмалэсь но дуно сыӵе улонэз уён. Кылем арын воштӥськонъёс пыртэмын вал кун йӧскалык политикая эсэплыко эрикрадэ. Йӧскалык кусыпъёс понна табере кыл кутоно луозы муниципал кылдытэтъёслэн Тӧрооссы. Озьыен матысь дырлы тужгес но кулэлыко юан – муниципал кылдытэтъёсын та удысын ужез радъян. Соин ик министерствоысь ӧнерчиосын ёросъёсы, каръёсы потаны малпамы интыысь ӧнерчиосын пумиськон, вераськон, валэктонъёс сётон но шуг-секытъёсты шараян понна.

Кез ёросын пумиськон пайдалыко ортчиз. Ёрослэн Тӧроеныз, Администрациысь ӧнерчиосын, мерлыко огазеяськонъёслэн ёзчиосынызы, журналистъёсын кенешыса та удысысь ужпумъёсты быдэстон вылысь азьланяз ӵошен ужан сярысь пумкылъян кутэмын вал. Тау кареме потэ «Кез ёрос» муниципал кылдытэтлэн Администрациезлы ужрадэз ортчытэмзы понна, калыкъёс кыспын тупаса улонэз утемзы понна».