6-тӥ инвожое Удмуртилэн Тӧроезлэн воштӥсез Роман Ефимов, Удмуртиысь Тӧролэн но Кивалтэтлэн Администрацизылэн кивалтӥсез Александр Журавлёв, йӧскалык политикая министр Эдуард Петров, тазалыкез утёнъя Сергей Багин Удмуртиысь Мусульманъёслэн Улосвыл Духовной Кивалтэтазы ветлӥзы. Та нуналэ намаз ортчытӥське, Курбан-байрамез шулдыр ортчыто, озьы ик юрттэт сёто соослы, кинлы со туж кулэ.

Александр Журавлев тау кариз Удмуртиысь мусульман мерлыклы, элькунмылэсь азинтон удысаз тыршемзэ висъяз: «Россилэн Презиентэз Владимир Владимирович Путин вера, кунмылэн вуоноез – егитъёсмы бордын, соослэн киязы. Тӥ пиналъёслы юрттӥськоды спортэн, кылдытос ужен, туризмен вырыны, мылысь-кыдысь вераськоды, валэктӥськоды, асьме кунмы – трос йӧскалыккуспо но трос вӧсьбуро кунмы шуыса».

Удмуртиысь Мусульманъёслэн Улосвыл Духовной Кивалтэтсы дорын футбол шудонъя инты лэсьтэмын – быдэс ар ӵоже нылпиос шуныт юртын яратоно спортэнызы выро. Нуналаз оглом 200 нылпи ветлэ татчы.

Озьы ик Муфтиятлэн но Ижкарысь ужбергатонниослэн мерлыксылэн юрттэменызы дышетскисьёслы ватсаса тодон-валан сётонъя центр но туризмъя клуб усьтӥськизы.

Тодэ вайытом, Удмуртиысь Муфтият секыт югдуре шедем трос нылпиё семьяослы, анай-атайтэк кылем нылпиослы юрттэ. Озьы ик нылпи куштонлы пумит луись кабинетъёс кылдытэтын, кылем арын 430 кышномурт нылпизэ куштонлы пумит луиз.

«Приют человека» – эшшо одӥгез валтӥсез мусульманъёслэн ӵектоссы. Со оген кылем пересьёслы но ӧлексыослы сӥземын. Татын котькудӥз адями шуныт дӥсь вайыны быгатэ.

Ивортодэт УЭ-ысь Тӧролэн но Кивалтэтлэн вотэсбамысьтызы.