Туала мерлыклэн, лулчеберетлэн азинскон сюресаз адскымон инты басьтэ нимысьтыз кылдытэм институт/клуб, кудӥз огазея пӧртэм тунсыкъёсын, пӧртэм арлыдо но пӧртэм удысын тыршись адямиосты. Самой сыӵе ик луэ Йӧскалык лыдӟетъюртын ужась «Край удмуртский» нимо клуб. 17-тӥ южтолэзе со пусйиз 30 ар ужамзэ.

Ужрад ортчиз Калыкъёслэн эшъяськон юртазы. Туж трос куноос люкаськизы. Солы паймонэз но ӧвӧл, угось 30 арскын та Клублэн ужаз пыриськизы 7500-лэсь ятыр адямиос.

Клублэн кулэлыкез туж бадӟым, малы ке шуоно ужан дыр куспаз со югдытӥз шаертодон, литература, элькунамы улӥсь калыкъёслэн истори удысъёсысь вормонъёсыз, трос уж лэсьтӥз йӧскалык кусыпъёсты радъян но юнматон удысын.

Удмурт Элькунысь йӧскалык политикая министрлэсь ужзэ быдэсъясь Л.Н. Буранова вылӥ дунъя клублэсь ужзэ. Тужгес но дуно луэ, солэн малпамезъя, клуб сӧзнэтлэн вӧлмемез но паськытамез, угось туннэ нунал понна элькунамы котькыӵе сямен сэрегаз соос ужало, калыкъёслы куспазы тупаса улон мылкыд пыӵатыны юртто.