15-тӥ инвожое «Купол» стадионын С.М. Киров нимо паркын Удмуртиысь V Конфессиос куспын спартакиада улсын капчиатлет кроссъя ӵошатсконъёс радъяськизы. Пыриськиз 300-лэсь трос адями – православнойёс, мусульманъёс, иудейёс но старообрядецъёс.

Сӥё-дано усьтонын пыриськисьёсты ӟечкылазы Сарапулысь но Можгаысь епископ Павел, УЭ-лэн муфтиез Фаиз-хазрат Мухамедшин, «Звезда Давида» еврей огазеяськолэн валтӥсь раввинэз Михаил Голуб, йӧскалык политикая министр Эдуард Петров но мугор лулчеберетъя но спортъя министр Денис Парахин но Пичи Пурга ёрослэн тӧроез Александр Деев.

Спартакиада спорт но семья праздниклы пӧрмиз. Тросэз ӵошатсконъёсы быдэс семьяосынызы вуизы. Нылпиос понна нимысьтыз вожвылъяськонъёсын но кузьымъёсын шулдыръяськон программа дасямын вал. Нош бызыьлонъёс бере вань пыриськисьёсты перепечъёсын но пӧсь чаен куно каризы.

Конфессиос куспын спартакиада витетӥ арзэ ини адямиосты огазея, пӧртэм вӧсьбур, йӧскалык но политика тодметъёс шоры учкытэк.

Ужрадлэн радъясьёсыз – Ижкарысь епархия, УЭ-ысь йӧскалык политикая министерство, мугор лулчеберетъя но спортъя министерство.

Котырес лыдпус тырмись спартакиадалэн программаез куинь люкетлэсь кылдытэмын: куасэн бызьылон, капчиатлет кросс но уйпал ветлонъя ӵошатскон. Тулыспалэ Г.А. Кулакова нимо спорт комплексын 3 но 5 иськем дистанцие пыриськиз 622 адями. Нош сӥзьыл радъямын луоз уйпал ветлонъя ӵошатсконъёс.

Удмуртиысь но Ижкарысь епархилэн ивортодэтъёсызъя.