22-тӥ оштолэзе Егитъёслэн юртазы ортчиз «Курагур» проектлэн йылпумъян концертэз. Та ӵектосэз малпаз но улонэ пыӵатиз удмурт егитъёслэн «Шунды» мерлыко огазеяськонзы. Та ужрадэ кыскемын вал егит кылбурчиос, крезьгурчиос но кырӟасьёс. Соос огъя кужыменызы удмурт кылын выль, пӧртэм жанрен кырӟанъёс кылдытӥзы. Учкыны мар пӧрмиз та огъя ужлэсь люкаськиз трос калык. Залын озьы ик пукизы вылӥ куноос но, соос пӧлын В.М. Соловьёв, Удмурт Элькунысь лулчеберетъя, печатья но ивортодэтъя министрлэсь ужзэ быдэсъясь, П.А. Орлов, Удмурт Элькунысь йöскалык политикая министрлэсь ужзэ быдэсъясьлэн нырысетӥ воштӥсез, Г.А. Юсупова, Удмурт Элькунысь егитъёсын ужанъя министерствоысь езэтэн кивалтӥсь, Н.А. Степанова, Калыкъёслэн эшъяськон юртысьтызы ёзэтэн кивалтӥсь.

Егитъёслэсь ужзэс учкон-дунъян бордын тыршиз жюри: Удмурт Элькунысь Калык артистка Надежда Уткина, калыккуспо вожвылъяськонъёслэн но фестивальёслэн лауреатсы Мария Корепанова, кылбурчи Петр Захаров, «Удмуртия» КТРК журналистэз Людмила Спиридонова. Соос дунъязы егитъёслэсь асьсэды сцена вылын возьыны быгатэмзэс, кырӟан устолыксэс, учкисьёсын кусып воземзэс но аспӧртэмлыко луны тыршемзэс.

Финалэ потэмын вал 11 кырӟасьёс. Капчи öй вал жюрилы таос пöлысь тужгес но ӟечсэ бырйны. Кема кенешемзы бере соос огкылэ вуизы – вормиз Алексей Пикулев. Алексей удмурт кырӟанэз рэп амалэн быдэстӥз. Жюри тодмостӥз солэсь аспӧртэмлыко луэмзэ, кырӟанзэ кылзӥсь доры вуттыны быгатэмзэ. Вормисьлы кузьым – азьпалан клип лэсьтыны луонлык.

Тужгес но зол кылбурчиен ялэмын вал Михаил Михайлов. Солэн кылъёсылы крезьгур гожтӥз но бöрысь сцена вылын кырӟаз Юлия Гаврилова.

Удмурт Элькунысь егитъёслэн парламентсы нимысьтыз визъяз Артемий Гавриловез. Нош учкисьёслы тужгес но ярам Екатерина Федорова. СМС гожтэт пыр со понна 37 куара сётэмын вал.

«Куарагур» проект «Шунды» огазеяськонлэн тужгес но тунсыкоез но азинлыкоез луиз. Соин ик егитъёс малпало сое азьланьтыны. Оско, сӥзьыл мукет егитъёслы но шуд усёз асьсэлэсь кужымзэс эскерыны та проектын.