Калыкъёслэн Эшъяськон юртазы УЭ-лэн Тӧроеныз ӵош Мерлыко кенешлэн йӧскалыккуспо но вӧсьбур герӟетъёсъя кенешонэз ортчиз. Ужрад 40-лэсь трос йӧскалык-лулчеберетъя но 312 вӧсьбур огазеяськонъёсты валчеяз. Пумиськон радъямын огкылысь улонэз юнматонлы но калык кусыпъёсты умоятонлы, ваньмыз со Россиысь Азьмуртэныз юнматэм «Семья» йӧскалык ӵектослэн ужпумъёсызлы тупа.

Валтӥсь тема – кунсьӧр муртъёсты дунлыкъёсты лыдэ басьтыса Россиын улыны дышетон.

Кенешонэз усьтыку, УЭ-лэн Тӧроез Александр Бречалов пусйиз: «Социологической эскеронъёслэн йылпумъянъёссы возьмато: элькунысь 85% улӥсьёс йӧскалыккуспо герӟетъёсты ӟечен лыдъяло. Со асьмелэн тыршем валче ужмылы вылӥ дунъет луэ».

Йӧскалык политикая министр Эдуард Петров аслаз докладаз кунсьӧр муртъёслэсь мер но лулчеберетъя удысын лэсьтэм ужъёс сярысь пыр-поч вераз. «9 толэзь куспын 2025-тӥ арын 60-лэсь трос йӧскалык-лулчеберетъя огазеяськонъёслэн кивалтӥсьёсынызы пумиськонъёс ортчылэмын, кунсьӧр муртъёслы МВД-ен ӵош нимысьтыз пумиськонъёс радъямын. Таӵе сӧзнэто уж калыкъёс куспын шуг-секытъёсты палэнтыны юрттӥз но мерлыкыны ӟеч югдур кылдытӥз», — пусйиз Эдуард Петров.

Нимысьтыз саклык висъяське мер ӵектосъёслы. Калыкъёслэн Эшъяськон юртсылэн кивалтӥсез Юлия Шахтина «Можем-поможем. Семейный центр адаптации мигрантов»  ӵектосэз улонэ вӧлмытон сярысь вераз. 1-тӥ шуркынмонэ ӵектослэн кыкетӥ люкетэз кутске. Нырысетӥз 300 адямилэсь трос огазеяз, 70 пала семьяосты, 130 пиналъёсты.

«Арарат» улосвыл мер огазеяськонлэн кивалтӥез Арсен Мосоян вераз, кызьы пиналъёсты ӟуч лулчеберетэз эскерон но воскресной школаос улсын дунлыкъёсты пыӵатыны. «Элькунын мыло-кыдо армян, азербайджан, узбек но таджик школаос ужало, кытын нылпиос Удмуртилэн лулчеберетэныз но сям-йылолъёсыныз тодматско но ӟуч кылэз дышето», — пусйиз Арсен Мосоян.

Ужрадлэн пумаз пыриськисьёс пуйсизы удысэтъёс куспын кусыпъёсты азинтон сярысь но люкам опытэз уже вӧлмытыны кунсьӧр муртъёслэн адаптациязы.