21-тӥ коньывуонэ 13.00 часэ Калыкъёслэн Эшъяськон юртазы кореецъёслэн Кыдёкысь Ӵукпалась Шор Азие выжемзылы 80 ар тырмонлы сӥзем ӝыт радъяськоз. Ужрадэз дася «Удмурт Элькунысь кореецъёслэн «Мугунхва» мерлыко огазеяськонзы». Олеся Кимлэн ивортэмезъя, ужрадлэн валтӥсь меретэз – Россиысь кореецъёслэн историенызы, секыт адӟонэнызы тодматон. Секыт адӟонъёс, ыштонъёс пыр потыса но, кореецъёс быгатӥзы асьсэ калыксылэсь лулчеберетсэ утьыны, калык шӧдонзэс возьыны.

Ужрадэз кутскыны чакламын мерлыко огазеяськонлэсь кивалтӥсьсэ Э.А. Тенэз буре ваён бордысен. Бӧрысь люкаськем калыкез тодматозы огазеяськонлэн ужърадъёсыныз, ӵектосъёсыныз. УдГУ-ысь доцент Н.Е. Цепулина «Краткий экскурс в историю корейцев России, причины депортации» темалы доклад лыдӟоз. Озьы ик возьматэмын луоз калыклэн кӧчемез сярысь но кореецъёслэн Выль Ар пумитан сям-йылолзы сярысь видеофильм. Нош фойеын корей калык дӥськутэн адӟытон ужалоз. Йылпумъяськоз ӝыт корей иероглифъёсты гожтыны дышетонъя мастер-классэн но тхэквандоен вырись пиналъёслэн быгатонлыкъёссэс возьматонэн.